کراچیءَ بلوچانءِ حقانءِ پانکجنیں یک دگہ سریں جھدکارے بلوچ دشمنیں واکان وتی ناروائیءِ آماچ کت؛ ٹرانس لیاریءِ جاھمنندیں نثار حسین بلوچ کشگ بوت۔شنبہ 7 نوامبرءِ صحبا کلاک 10:15ءَ نثار وتی موٹر سائکلا سوار راھی بیتگ کہ دگہ دو موٹر سائکلاں سواریں مردماں تیرجتگ۔ أمبولنسےءَ نادراھجاھا سرکتگ، ألبت اودا داکٹراں کشتگ کہ آئیا پیسرا ساہ داتگ۔
نثار بلوچ کراچیءِ بلوچانءِ نیاما نامداریں جھدکارے زانگ إبیت و آئیا بازین پڑاں پہ بلوچءِ آسودگیا تـُـکشتگ۔ آئیءِ نوکتریں تچ تاچ پہ گٹرباغیچہ نامیں پارکےءِ رکـّینگا بیتگ۔ مھاجراں إے پارکءِ مزنیں بھرے دست گپتگ و اودا پہ وت لوگ أڈ کنگ و بها کنگا واهوک أنت۔
شنگ بیتگیں حالانءِ ردا جمعہءَ آئیا گوں کراچیءِ حالکاراں تران کتہ بیتگ۔ اودا آئیا 'متحدہ قومی موومنٹ' نامیں مھاجرانءِ گلے نام گپتگ کہ گٹر باغیچہءَ دستگروکانءِ پشت پناہ إنت۔ ھمے حالتاکی دیوانءِ تھا نثار حسین بلوچ تـُرس ظاھر کتگ کہ آئیا کش أنت۔
نثار بلوچءَ شھید کنگءِ حالءِ تالان بیگا رند کش گوری بلوچ دگاں دراتکگ أنت۔ آواں دگ پہ گاڑیانءِ روگ آیگا بند کتگ أنت و سرکارءِ خلاف دانک إش کوکـّار کتگ۔ آواں لوٹ کتگ کہ کوشؤک رسگا دستگیر کنگ بہ بنت۔ ألبت ھندی پولیس تاں أنگت بے توار إنت۔
نثار بلوچ یک چاگردی جھدکارے بیگءِ کشا إسکول وانیوکیں اُستادے أت۔ آئیا وتی جھد 1976 ماں دمکےءَ وتی پچ کتگیں وانینگ جاھےءَ گوں بندات کتگ أت۔ 'شمئے وانگجاہ' نامیں ھمے بنجاھا نثار بلوچءَ کسان و مزنیں بلوچ مفتا وانینتگ إتنت۔
سال 1986ءَ آئیا 'بلوچ پروموٹیف کمپیوٹر و إنگلش لنگویج سنٹر' جؤڑ کت و ھمے بنجاھا ھزاراں کساں ھمائیءِ دستءِ چیرا کمپیوٹرءِ کارمرزی و إنگریزی ھیئل کتگ۔
نثار بلوچ سانگ کتہ بیتگ و آئیءِ جن ھم یک إسکولی اُستادے إنت کہ ماں گوادر کار کنت۔ دوئیان شہ وت ھچ چک نہ بیتگ، ألبت یک دگہ چکے رودینگا بیتگ أنت۔
کراچیءِ تھا شہ بازیں سالاں یک نیمگےءَ گچینی جھدکار کشگ بیگا أنت و دئومیا بلوچ ورنا وت ماں وتا گٹگیر أنت۔ بازیں گچینی بلوچ ھمے پندلءِ آماچ بیتگ أنت و دگہ بازیں کس شہ بیمّا بیتواریءِ زند گوازینگا أنت۔
کشگ بیتگیں گچینی بلوچانءِ نیاما بلوچ إتحاد تحریکءِ محمد أنور -بائیجان، زاھد حسین بلوچ، رحمان بلوچ و مھران آزادی پدّر تریں نام أنت۔ ھمیشانءِ لڑا نثار حسین بلوچءِ نام گيئش کنگ بوت۔
Source: www.balochinews.co
No comments:
Post a Comment