Long live free and united Balochistan

Long live free and united Balochistan

Search This Blog

Translate

لندنءَ شھید بالاچءِ یادگاری دیوانے دارگ بوت

ماں لندن میر بالاچ مریءِ شھمیریءِ دئومی سالروچءِ درگتا دیوانے دارگ بوت۔ دیوانءِ خاصیں مھمان میر خیربیار مری أت۔ ماں لندن جاھمنندیں بازیں بلوچ، سندی و یورپی مردماں دیوانا بھر زرت۔

میر خیار مریءَ وتی گپانءِ تھا شہ کسانیا بہ گر تانکہ گوں میر بالاچ بیتگیں گڈی ترانءِ قصہ درشان کت أنت۔ و سرکچ ئی دات کہ کجا سبباں آئی سکیں داتگ کہ پہ وتی سرڈگارءِ آجوئیا سلاحبندیں جنگ بہ کنت۔

میر خیربیارءَ ترانگ دات کہ وھدے 1970ءِ دھرا بٹوءِ سرکشـّیا پاکستانی فوجا بلوچانءِ سرا تیر و توپگواری کتگ، ھمے درگتا آئیءِ پت سردار خیربخش مری بندیگ بیتگ۔ و ٹپی یکـّوئی آوانءِ گسا پہ دوا درمانا آتکگ أنت۔ گڈا پہ دوا درمانا وتی کسان عمریا آواں توجیل کنگ جھد کتگ۔

میر مریءَ دیمترا سرکچ دات کہ پاکستانی پارلمنٹا چکـّاسگا رند آ پوہ بیتگ أنت کہ إے پارلمنٹءِ مقصد بلوچانءِ مغزاں بیراھیا سر کنگ إنت۔ پمیشا باز چار بچارا رند شئور إش بست کہ أبید شہ وتی ملکءِ آزادیا دگہ راھےءَ آ نه رو أنت۔ پہ آزادیءِ جھدءِ دیما برگا میر بالاچءَ لندن یلہ دات و بلوچستانءَ شت۔

میر خیربیار مریءَ یک گپـّے تچک کت کہ آواں وتی عملی جھدا بندات کنگا ساری إے شئور بستگ کہ پیشیانءِ وڑا پہ بھا کنگا وتی جھدءِ قیمت نہ بند أنت و تانکہ سوبینیا پہ بلوچستانءِ آزادیا جھد کن أنت۔

شہ میر خیربیارءَ ساری دیوانءِ أولسرا سندی جھدکار لکـّو لھاناءَ تران کت۔ آئیا وتی ترانا بالاچء ِزندگی نامہ بیان کت و جھدئی کت کہ بالاچ و عطاءاللہ مینگلءِ سیاسی رشتگے جؤڑ بہ دات۔ ھمے وڑا حزب مردم بلوچستانءِ ناصر بلیدائیءَ ھم إشارہ کت کہ بالاچ و عطاءاللہ مینگل ھمدیوان بیتگ أنت۔

ھر دوئیں مردم شموشکار إتنت کہ بے نظیر و سردار خیربخش مری ھم ھؤر نشتگ أنت۔ ألبت أگر گوں پچیں چمّاں بہ چارئے، گڈا ودی إبیت کہ بے نظیر پہ پاکستانِءِ سوبینی و بلوچستانءَ غلام دارگا جھدا أت و خیر بخش مری پہ آزاد بلوچستانءَ بادے مرچی پاکستان و إیرانءِ دیما اوشتاتگ۔
إیشیا أبید أگر بالاچءِ راھا سردار عطاءاللہ منـّوک بیتین أت، گڈا وتی چک و نماسگ ئی ھما کشکا گرگءِ سکین داتگ إتنت؛ نے کہ بی إن پیءِ ناما پارلمنٹی سیاستءِ کشکا گرگئے۔

لکو لھاناءِ خبراں کہ أولسرا أتنت، دیوان إش سارت ترّینت و مردم أبکه إتنت۔ چدا پد تران کنوکیں مردمانءِ خبرانءِ گوشدارگا نندوکانءِ بے مھری ألکاپیا ودی أت۔ ألبت رندترا واجہ خالد لانگو کہ وتی ترانا إشارہ کت کہ بالاچءِ جھدا گوں سوداگراں ھچ سیادی نیست، گڈا دیوانا پدا ساہ مان بیت۔

خالد لانگوءَ گشت کہ آئی دلجم إنت کہ پیسری لیڈرانءِ وڑا إے رندییں بھا بیوک نہ أنت۔ آئیا درشان کت کہ پیسریاں براں برانا کہ شرّی نِھادے که رستگ، گڈا زر إش زرتگ و یک کرّا نشتگ أنت۔

بلوچستانءِ راجی زرمبشءِ سریں جھدکار مھندس عبداللہ بلوچ شہ پیسرتری تران کنوکاں یکـّے أت۔ عبداللہ بلوچءَ تچک تچکا گشت کہ بالاچ سرپد بیتگ کہ وتواجھی، جھموری و فڈرال گپ أبید شہ راجی آزادیا مردماں بے راھیاں سر کن أنت۔ ھمے سرپدی میر بالاچءَ ھست أت۔ پمیشا آئیا وتی جان پہ بلوچستانءِ آزادیا ندر کت۔

جمیشد أمیریءَ میر بالاچءِ ستایا شعرے وانت۔ شعرا وانگا ساری آئیا سرکچ دیگءِ جھد کت کہ مشرقی و مغربی بلوچستانءِ جاور شہ یکـّا دگر گستا أنت۔ مغربی بلوچستانءِ سیاسی جھد نیستی برابر إنت۔
ألبت رندترا وھدے بلوچی نیوزءِ نمایندوا جست کت کہ یورپ و أمریکاءَ کہ سیاسی آزادی باز ھست إنت و شہ مشرقی بلوچستانءَ مغربی بلوچستانءِ مردم گيئشتر أنت، پرچا آزادیءِ جنزا ھؤریا چست نہ کن أنت؟
واجہ جمشید پسّو دات کہ إے شہ ملکا در أنت۔ پمیشا إیشانءِ ھوریں جھدا کارپد نیست إنت۔
واجہ أمیری شموشکار أت کہ جابریں ملکانءِ تھا ھچبر سیاسی جھدءِ إجازت نیست إنت و آوانءِ خلافا مدام ماں دریں ملکاں راہ گيشینگ بیتگ أنت۔

داکٹر مصطفاءَ گشت کہ آزادی ھر قومءِ حق إنت۔ آ قوم بلوچ بہ بیت، سندی یا پنجابی۔ ھر قوم باید پہ آدگہ قوما آزادیءِ منوک بہ بیت۔ ألبت بلوچاں غلام داروک ناسرپدیں قوم أنت۔ پمیشا آ شعوری خبراں پوہ نہ بی أنت۔ ماں إے دیوان رحیم بندوی إیوکیں کس أت کہ بلوچی سیاھگے پہ بالاچءِ ستاءَ وانت ئی۔

میر غلام حسینءَ شھید بالاچ ستا دات و گشت کہ مئے إیوکیں نزوری تپاکی إنت۔ ھمے تپاکیءِ باروا ناصر بلیدائیءَ ھم إشارہ کت۔ ناصر بلیدائی خبراں بیمے ودی أت کہ بلوچءِ تھا لیڈرشپ کوالٹی نیست إنت۔ مھراب سرجوءَ وتی فلسفیانہ ترانا گوں کموکیں گالاں میر بالاچءِ قربانی ماں سما و سساءِ قالبا شرّی سرا إیر دات۔

ولید گربنیءَ سرکچ دات کہ بلوچ قوم ھنچؤش کہ دنیاءِ آدگہ قوماں غلامی منـّوک و زوراکی اوپار کنوکے نہ إنت۔ پمیشا بالاچءَ وتی سَولیں سر ندر کت و نواب أکبر بگٹیءَ ھشتاد سالءِ عمرا وتی و وتی ھمراہ قربان کت أنت۔

میر خبربیار مریءَ یک رندے پدا پدّر کت کہ بلوچ ھما وھدی إیرموش إبنت کہ زورگر شہ بلوچستانءَ در بہ کپ أنت و بلوچستانءِ پچگپتگیں آزادی پدا برجاہ بہ بیت۔

دیوانءِ جارچینی واجہ صمد بلوچءِ دستا أت کہ آئیا گوں سروکانءِ زرّیں قول و جھل بزانتیں شعرانءِ وانگا تامداریں وڑےءَ دیما برت۔

مہ شموشیں کہ داکٹر نصیر دشتیءِ تامداریں سیاھگ کہ آئیا بالاچ کورگیج و بالاچ مریءِ قربانیانءِ ھمدروری و گستائیں مقصدانءِ باروا ردبند داتگ أت، دیوانا نندوکیں وانندویں ورنایاں باز دوست بوت۔
۔
دیوانءِ دیما شعر وانوک و گپ جنوکیں آدگہ مردمانءِ نیاما واجہ شھاب رکنی، بانک ثریا مخدوم، بانک مھناز بلوچ و بانک 'إسٹیلا' ھؤر إتنت۔
بانک إسٹیلاءَ گشت کہ بلوچ باید گون دنیاءِ آ دگہ پادمالیں قوماں وتا نزیک بہ کن أنت و شہ آوانءِ جھدا سبق بہ گر أنت۔ آ توریں تامل،
کرد، کشمیری و سندی بہ بنت یا لاتین أمریکاءِ پادمالیں قوم؛ پھکاں گوں یکـّا دگرا نزیک آرگا آئی جند ھم جھدا إنت۔
Source: www.balochinews.com

No comments:

Post a Comment