بلوچی نیوز :پاکستان و ایرانءِ سلاحبندیں واکانی دستا دو روچانی نیاما 10 کس کشگ بیت انت۔ شہ کشگ بیتگیناں 3 ایرانیاں کشتگ انت و 7 پاکستانیاں۔ شنگ بیتگیں حالاں داتگ کہ بلوچستانءِ سیمسری ھند بلیدہءَ یک گاڑییے روگا بیتگ کہ پاکستانی فوجیاں سواریں مردمانی سرا تیر جتگ۔ ایشیءِ سببا دو کس کشگ بیتگ انت۔ البت جنیں آدم رکـّتگ انت۔ کشگ بیتگیں مردمانی نام پرویز و خدابخش شنگ کنگ بیتگ انت۔
شہ ایشی رند ماں بلوچستانءِ زرا یک کشتیےءَ سواریں مردم ایرانی واکاں تیر جتگ انت۔ ایش گوادرءِ نندوک بیتگ انت۔ تیراں سئے کس کشتگ انت۔ پاکستانی حالتاکاں کشگ بیتگیں مردمانی نام گل محمد، محمد حسن و سیف الرحمان شنگ کتگ انت۔
البت روچتاک 'انتخاب'ءِ شنگ کتگیں حالےءَ داتگ کہ گل محمد بیران نہ بیتگ و اے وھدی بے ھوشیں حالتا کراچیءِ یک نادراھجاھےءَ درمان بیگا انت۔
نوکتریں بیڑےءَ پاکستانی واکاں اختر مینگلءِ ناکو ایوب گچکیءِ لوگءِ سرا زی بیڑ برتگ۔ اے بیڑا ایوب گچکیءِ دو زھگ و دگہ سئے بلوچ جنگ بیتگ انت۔ جوابی تیراں دو پاکستانی فوجی ھم کشتگ انت۔
ایوب گچکیءِ لوگا جنگ بیتگیں بلوچانی نام مراد گچکی، زبیر گچکی، حاصل، ھمّل و ماجد شنگ بیتگ انت۔ مرتگیں فوجیانی نام دیگ نہ بیتگ انت۔
No comments:
Post a Comment