مغربی بلوچستانءِ إستقلال طلبی جھد شہ مشرقی بلوچستانءِ جھدا کوَھنتر إنت۔ چمشانک

بحثے کہ مرچاں مغربی بلوچستانءِ بلوچ سیاسی جھدکارانءِ نیاما دیما رَوَگا إنت ھمیش إنت کہ مغربی بلوچستانءِ آزادیءِ گپا جنوکیں سیاسی گل 'بلوچستانءِ راجی زرمبش'ءَ شہ مشرقی بلوچاں أثر زرتگ۔ ھمے نظرءِ مردمانءِ گشگ إنت کہ راجی زرمبش إیرانءِ جاوراں ڈالچار کنگا إنت۔ آوانءِ خیالا إیرانءِ جاور چؤش نہ إنت کہ اودا آزادیءِ گپ جنگ بہ بیت، ألبت پاکستانءِ جاور پہ آزادی لوٹوکیں بلوچاں گيگ أنت۔ ھمے بحثءِ دوئیں سراں دیما بروک مغربی بلوچستانءِ وتی جھدءِ پژدرا ڈالچار کنگا أنت؛ شاید روا مہ بیت کہ بگشئے شہ پژدرا ناڈاہ أنت۔

راستی إیش إنت کہ أگر مردم میر دوست محمد خانءِ 1928ءِ جنزا شموشکار إنت، بلے مغربی بلوچستانءِ عبدی خان، جمعہ خان، رحیم زردکوھی، أکبر بارکزئی و دگہ جھدکارانءِ گل 'بلوچستان لبرئشن فرنٹ'ءَ کہ ماں عراق پہ مغربی بلوچستانءِ آزادیا ٹھینگ بیتگ أت؛ مہ شموش أنت۔ ھمے ٹولیءِ جھدکار رحیم زردکوھیءَ ماں بلوچستان چھر کنگا رند إیرانءِ خلافا سلاحبندیں جنگے 'زرمبش'ءِ ناما بنا کت و ھمے راھا وتی سر ئی ندر کت۔ أکبر بارکزئیءَ گوں سنگتاں ماں لندن 'گریٹر بلوچستان'ءِ ناما تاکبندے کشّ إت۔ أکبر بارکزئی گوں سنگتاں أولی کس إتنت کہ 'گریٹر بلوچستان'ءِ نقشہ إش ٹھینت۔

مشرقی بلوچستانءَ آزادیءِ گپ شہ قلاتءِ زورگرگا پد إیوکا پرنس عبدالکریمءَ بنا کت۔ وھدے آ دستگیر و بنديگ کنگ بوت، گڈا آزادیءِ خبر گار بوت و پہ پاکستانءِ ون یونٹءِ پروش دیگا مردم گوں بنگالیاں ھؤر جھدا گولائیش بیت أنت۔ پدا دومی رندا کہ آزادیءِ گپ شہ مشرقی بلوچستانءَ چست بیت آ شھید أعظم نواب أکبر شھباز بگٹیءِ شھادتا پد إنت۔ ألبت ھمے نیاما 'گریٹر بلوچستان لبرئشن آرگنائزشن' نامیں گلےءَ کہ آئیءِ راھدربری مغربی بلوچستانءِ مردمانءِ دستا أت، آزادیءِ گپ ئی جت۔ ھمے گلءِ مسعود سردارزئیءَ مان لندن برجم داشتگیں دیوانےءَ گشت کہ بلوچستانءِ جیڑوانءِ إیوکیں حلا آوانءِ گل راجی آزادی تها گندیت۔ ھمے مسعود سردار زئی کہ میر عبدی خانءِ نماسگ إنت؛ مرچی 'بلوچستان لبرئشن آرگنائزشن'ءِ سروک إنت۔

بلی توریں مشرقی بلوچستانءَ آزادیءِ گپ بیگا إنت، سیاسی و سلاحبندیں جھدکار آزادیءِ پلانگریا بیان دی أنت، بلے اودا بادے مرچی چشیں سیاسی گلے نیست إنت کہ آئیءِ آئین یا پروگرامءِ توکا بلوچستانءِ آزادیءِ گپ بہ بیت۔ مغربی بلوچستانءَ چدا پیسر ھم بیتگ و أنگت ھم 'بلوچستانءِ راجی زرمبش'ءِ ناما ھچؤشیں گلے ھست إنت۔

مرچی مشرقی و مغربی بلوچستان دیم پہ یکتواریا گامگیج أنت۔ أولبر إنت کہ مشرقی بلوچستانءِ سریں جھدکار مغربی بلوچستانءِ سرا بیوکیں زوراکیاں إیرجنگا أنت کہ چدا پیسر نامداریں سردار عطاء اللہ مینگل ھم مشرقی و مغربی بلوچستانءِ یکـّیءِ تاریخی حقیقتا منـّوک نہ بیتگ۔ پمیشا إے گپ کہ مغربی بلوچستانءِ جھدکارانءِ دپا آزادیءِ گپ شہ مشرقیاں آتکگ؛ رد إنت۔ إیشیءِ بدلا چؤش گشگ شرتر إنت کہ مشرقی بلوچستانءَ راجی آزادیءِ فلسفوا ردوم دیوکیں بلوچانءِ بُنزہ مغربی بلوچستانءَ إنت۔ مرچی که پھک یک و یکتوار أنت کہ إیران و پاکستانءِ زورگری آسر کنگ بہ بنت؛ إے سوبینیءِ توکا جمعہ خان، عبدی خان و دگہ بنی جھدکارانءِ بنا کتگیں جنزءِ کارکردا سرگوَز کنگ روا نہ إنت۔

پمیشا بلوچ جھدکار أگر وتی واکا فدرالیزم، سوسیالیزم و یا دگہ إزمےءِ ردوم دیگءِ بدلا لبریشنءِ فلسوا رندگیری بہ کن أنت، إیشیءِ ثمر پہ قومءِ عاقبتا شہ ھرچیزا گيئشتر أنت۔ اودا کہ مردمانءِ ترس إنت کہ بازیں بلوچ آزادیءِ راھا تاوان إبنت، گڈا شہ آواں دستبندی إنت کہ دپترا بہ چار أنت و بہ گش أنت باریں گيئشتر بلوچ آزادیءِ راھا شهید بیتگ أنت یا کمیونزم، سوسیالیزم، سلطنت طلبی، مجاھد و....ءِ ناما زوال بیتگ أنت؟

http://www.zrombesh.org/