سی سیاھین, کهرین و دراجین سال بیئگا انت کہ ملاهانی جابرین, شئونیستین و مرکز گرائین حکومتے مان ایران و ایرانءِ قومانی سرا برجاه انت. هر روچے چہ اے سیئن سالان کہ گوستئگ په ایرانءِ مردمان و قومان یک مصیبتے چہ پیسرگین مصیبتان گیش بیتگ.
مسترین چالشے کے مرکز گرائین ملاهان په سجهین ایران و دنیایا جوڑ کتئگ, آیانی اتمی پروگرام انت. ملا چو سرپد انت کہ دنیا مان یک مزنین بدلی دیما روئگاانت و اے بدلیانی درگتا هر ملکے همے کوشستا کنت کے هما کارا بکنت کے ایانا گیشتر سیت و نف رسیت پرچیا کہ آ پیسرگین دو بلوکی دنیا دگہ موجود نئنت و اے درگتا بازین ملکے کہ آ ڈولا ملاهانی دیما به اوشت انت نه اوشت انت و لهتے گپ چہ دیالوگ و بازین گپ چہ لب و ملاما جنت و لهتے چہ ملکان په دو تلی و دو پوستیا ملاهانی پشت و پناھیا کننت پر چیا آ ایرانءِ حکومتانی روحیهءَ شر زاننت کہ چتور آیانی بگلانی چیرا کیٹگ ایر بکننت تا کہ ایرانءَ شرتر بپاچنت.
ھما ملک کہ فکر کننت کہ ملاهان گون لب و ملامءِ دیگءَ چہ اے راهءَ بزان اتمی پروگراما پد بتریننت, اے صرف وهد انت اے جوابا دنت کہ باریں کامیاب بنت, بلے بیائین بچارین اے دابین کاران گون اے نمونه این حکومتان تاریخءِ تها چونیں نتیجه داتگ.
تاریخ همے گواهیا دنت کے اے نمونه این حکومت گون لب و ملاما راضی نبنت, بلکین اے پیمین حکومت گپ و ترانءَ یک فرصتے په وت گندنت و گون اے فرصتا آ وتا را په وتی شومین مقصدا نزیکترو نزیکتر کارنت و تا ھما جاهےءَ سر بئنت که پشتا کنزُئگ ناممکن بیت.
نزیک سی سال چہ ملاهانی حکومتیا گوستئگ و اے دراجین سیئن سالان ملاهانی دست گون کجام بدکاریان هور نبیتئگ و اے سیئن سالان ملاهان زندءِ کجام سهولت په وتی ملکءِ مردمان ودی کتئگ. اے دراجین مدتا کجام دیالوگا گون اے ملاهان ثمره داتئگ که اے رندیگین ثمره بدنت.
دومی جهانی جنگءِ تاریخ گوشیت کہ لب و ملام گون هیتلرءَ هچ ثمره اے نداتئگ بلکین چپئکا هیتلرءَ چہ لب و ملامان یک نیمگے سوب و دگے نیمگیا مهلت رسئت که شرتر و تی پانچورکان آلمانی سرا و رندترا وتی چپ و چاگردءِ ملکانی سرا سک تر بکنت و نتیجه دومی جهانی جنگ بیت و آ جنگا ملیونانی بے گناهین مردم اے نمونه این سیاستانی آماچ بیت انت. ما هنو همے گندگا ئیں کہ ملا هیتلرءِ سیاستانی رندگیریءَ کنئگاانت.
گر ملا اتمی سلاحءَ سلاح بند ببنت گڑا نه تیوکا ایرانءِ سجهین مردم و خاص در بندین قوم انگت غلام تر بنت بلکین سجهین منطقهءِ دروشم هم بدل بیت و نوکین جنگ و نوکین سلاح بندی پهکین منطقه ءَ وتی آماچ کنت.
اولی و دومی جهانی جنگ و آ دگہ جنگ کہ بیتئگنت همے گواهیا دئنت کہ ایرانءِ وڑیں ملاهانی حکومتاں وهدے کہ وتا دلجمیا سلاح بند کتئگ گڑا آیانی کوشست همی بیتئگ و بیت کہ وتی سیاهین حکومتیا گون وتی وت جوڑ کتئگین اکستریمستین گروپان دگہ ملکانی سرا ھم مصیبت بکننت۔ اے نمونه این دست مان کنئگ دگے ملکانی مسئلهان ملاهانی یکے چہ بنجاهی سیاست و ایدولوژی انت.
ملا فکر کننت کہ اتمی سلاح بند بیئگ یک وسیله اے بیت کہ آیانی حکومتءِ عمر دراجتر ببیت و شرتر بگوشئن اتمی سلاح ، آیانی حیالا په آیان آب حیات بیت. اے درگتا نه تهنکا چہ اے دگے ملکان گیشتر لب و ملام گپت کنت بلکین وتارا منطقهءِ مستر هم جوڑ کنت و اے ذریعه ءَ یک نیمگیا گون اتمی سلاح بندیا و دگے نیمگیا گون وتی وت جوڑ کتگین شیعه این گروپان نوکین منطقه ای نظمےجوڑ کت کننت.
اے امکان هم هست انت کہ ملا گون اتمی سلاح بندیا دنیایا مجبور بکنت کہ په وتی سیتء انچین قراردادء بندگء مجبور بکننت کہ چہ پیسرگین لب و ملامان باز باز مسترانت. اے ھم ظاھر انت کہ ملا گون اتمی سلاح بندیا قومانی حقءِ گرگءَ انگت مشکل تر کننت و هر نمونه این اپوزیسیون گون مزنین مشکلان دیم په دیم بنت, چوشین ماحولیا ریسک سک بازانت کہ دنیا چہ بازین مسئله و مشکلان چوشکہ قومانی مسئله انت, انسانی حقوقانی لگت و مال کنئگ انت سر بگوزانت.
محمد زین الدینی
No comments:
Post a Comment