میر خیر بیار مری و میر شیرمحمد بگٹیءَ شہ بلوچاں تپاکیءِ لوٹ کت

میر خیربیار مریءِ بیان کہ ماں روچتاک توار، انتخاب و دگہ ویبجاھاں شنگ بیتگ، گشگا انت کہ بلوچ وتی تپاکیءِ زورا دیما به رو انت۔ میانملکی بنجاھانی دیما پریاتءِ بدلا وت ماں وت تپاک بہ بنت۔

میر شیرمحمد بگٹیءِ بیان آنلائن شنگ بیتگ کہ گشیت "بلوچاں اے خبر یاد بہ بیت کہ مردمانی کشگ بیگءِ سببا قوم نہ کـُٹّ انت۔ البت ھما قوم خلاص بی انت کہ ھمّتا یلہ دی انت۔ دشمنءِ پندلانی پروش دیگءِ مقصدا پہ بلوچ قوما تپاکی ضروری انت"۔

بی آر پیءِ گوانکوا دیمترا شہ بلوچاں دستبندی کتگ کہ 11 آگستءَ قومی آزادیءِ روچءِ حسابا شادھی بہ کن انت۔ پاکستانءِ آزادیءِ روچ 11 آگستءَ سیاھیں روچےءِ حسابا بہ گوازین انت و 22 تانکہ 26 آگستءَ پاکستانءِ کارکردانی خلافا مچّی، ظاھری و قران وانی بہ کن انت۔

 

میر شیر محمد بگٹیءَ سرکچ داتگ کہ 22 تانکہ 26 آگستءَ پاکستانی واکاں نواب اکبر شھباز بگٹیءِ پناگاہ راہ بستہ بیتگ انت۔ و آواں ورگی سامان ھچ نہ رستہ بیتگ۔ گوں ھمے کارکردا پاکستانی واکاں یزیدءِ یاد زندگ کتگ۔

 

البت ھما ڈولا گوں امام حسینءِ شھید کنگا یزیدءَ اسلام شہ ردوم کنگا داشت نہ کت، ھمے وڑا بلوچستانءِ جنزءِ دیما دارگا پاکستان بے سوب انت و ھر بلوچ لوگا نواب اکبر بگٹیءِ وڑیں سر چست بیگا انت۔

Source: http://www.baluchinews.com