بلوچستانءِ جاوڑ مان گوستگین سالءَ نوهان سربازی

اے سال هن هنچوش که پیسریگین سالان سیاهین سالے مان بلوچ راجدپترءَ نبیسگءُ ثبت کنگ بوت.

گونڈین سرگوستے چه روایرشتی ءُ رودراتکی بلوچستانء جاوڑءَ مڑادارینءُ عزیزین وانوکانی خدمتءَ پیش کنان.

2012ءِ سال هنچوش که پیسریگین سالان گون اڑءُ جنجالان گوست.
اے سال هن هنچوش که پیسریگین سالان سیاهین سالے مان بلوچ راجدپترءَ نبیسگءُ ثبت کنگ بوت.

2012ءِسال گون ناتپاکی،ٹگیءُ چگولی،پلینڈیءُ ناهکین بهتام جنگان گوست.
اے گپ په پهکان پدرءُ الم انت که بلوچستانءِ هر هندءُ دمگےءَ آس روک انت.هر ساهتءُ هر دمانءَ یک ماتے،یک چکے،یک پتے یک گوهارے،یک براتے گون پاکستان ءُ ایران‏ واکانی هون وارینءُ دلوت سپتینءُ رسترین فوجیانی تیرانی آماچ بوت انت. مان رودراتکی بلوچستان ءَ گیش چه سیصد سهر بروتین بلوچ ورنا مان بلوچستانءِ پت گیابان کشگءُ چگل دیگ بوتگ انت ءُ گیش چه هشت هزار انگت بیگواه انت.

مان روایرشتی بلوچستانءَ هن بلوچ ءِ جاورچه رودراتکی بلوچستانءَ گهتر نه انت. اودان هن بلوچ راج مان وڑ وڑین زلمانی آماج ءُ لٹءُ کٹانی چیرا شهید بوت انت. بلوچ مان ایرانءِ اسلامی رژیمءِ بندیگجاهان گون وحشیترین شکنجهان شهید کنگ بوتگ انت.مان گوستگین سالا گیش چه دوصد بلوچ پاهو دیگ بوتگ انت ءُ گیش چه دوصد بلوچ بندیگ، پاهوءِ انتظارءَ انت.

پاکستانءُ ایران رسترین فوجءِ پروش دیگءِ ایوکین راه گون بلوچ راجدوستانی تپاکی،هوریءُ هورکاریءَ همگرنچ انت. تپاکیءُ مچیءِ زور چه پاکستانءِ اتم بمب،شاهین 1،2،3،4ءُ هنچوش ایرانءِ کوکائین راکٹانی زورءَ گیشتر انت.
گون هلوا هلوا کنگ دپ شیرکین نبیت عملی جهد هن لوٹ یت.

دزبندی انت چه بلوچستانءِ راجی گل ءُ تنظیمان، آهانءِ که پارلمانی جهد کن انت ءُ هنچوش چه آهانءِ که مسلح جهدءَ انت.آهانءِ که آزاتیءِ جهدءَ کن انتءُ چه اهانءِ که فدرالیزمءِ گپءَ کن انت.اهانءِ که دودءُ ربیدگی کاران گلایش انت ءُ هنچوش آهانءِ که خودمختاریءِ پکرءُ هیالءَ انت .ماتین گل زمین چه درستان دزبندی کنت لوٹ کنت پریات کنت ءُ کوشیت ، براتان کوهاران دانشورینءُ زانتکارین راجدربران، بیا ات تپاکیءُ هوریءِ بئیرکءَ گون دوئین دستان چست کن ات مهرءُ محبتءِکشارانءَ آپ دئیتءُ وتی ماتین وتنءَ چه اے بلاهین هژدیاهانءِ دپءَ که په بلوچ نسل کشیءُ بیگواه کنگءِ ازم ءُ عهداش کتگ، به رکین ات. اگه نه تمامین دانشورءُراج دوستءُ رهدربرءُ کماش میاریگ انتءُ نوکین نسلءِ اوبادگ آهانءَ ڈوباریت ءُ ایر جنت.

بلوچانءِ تپاکی سوبین باتءُبلوچستان سبزءُ آبات

 جنوریءِ 2013