نـروژ ءِ ليبرپارٹی بـزاں نـروژ ءِ سوسيال دمکراتانی هـوربنــد بيست ءُ دو جولای ءِ روچ ءَ کٹريــں عيسايی فاشيســم ءِ تروريســم ءِ آمـاچ بوت. «آندرش بـِهرينـگ بـريويک » ناميـــں ، زات ءُ زريات پرسـت ( نسل پرسـت، نژادپرسـت ) ءُ کٹريـں عيسايـی سـی ءُ دو ساليگيــں نيوفاشيستے امــن پسنديـں نـروژ ءِ ملـک ءُ مردماں گــوں سنگـدلـی ءَ ترور کـتنــت.
اسلوءِ پليس ءِ بيايانی ردا که سياهیں آدينه ۲۲ جولایءِ شپ ءَ شنگ بوتنت همے يکیں تروريست بمبے ءِ تراکينگ ءُ ليبــرپارٹی ءِ نوک ورنايانی کشگ ءِ مجرم انت. پليس گوشيت که اے مردم کُـش اولسـرا يک مزنيــں بمبے ملک ءِ سروزيرءُ هکومت ءِ کارگس ءِ ديما اير کتـگ انت ءُ رندا په ليبرپارٹی ءِ نوک ورنايانی کشــگ ءَ ديم په « اوت اويا» يک کسانیں جزيره اے شتـگ.
مـاں هما جزيره ءَ «ليبرپارٹی» ءِ نوک ورنايانی نماينده همک گرماگ ءَ جم بنـت ءُ اوداں ديـوان ءُ گپ تران کننـت ءُ جشن گرنـت. گوشگـی انـت که ليبرپارٹــی ءِ کمـاش ءُ رهــدربــر هـر سال ماں اے ديوان ءَ تـران کننـت. امبری کـم ءُ گيـش هپـت سـد ( ۷۰۰) نوک ورنا مـاں جزيـره ءَ جم بوتگت انـت . ملک ءِ سروزير ءُ ليبـر پارٹی ءِ کماش بزاں « يـنس ستولتنبـرگ» ءِ آيگ ءُ گپ ءُ تران برنامـه ءِ بهـرے بوتـگ. « گـرو هارلـم برونتلانـد» نروژ ءِ پيشيگیں سروزيـر همے روچ ءَ مـاں جزيـره ءَ گوں نوک ورناياں گپ ءُ تران کتـگ. بانک برونتلانــد ءَ ساهتے پيـش چه فاشيستيــں « بريويـک» ءِ آيگ ءَ چه « اوت اويا» ءَ در بوتـگ اَت..مـاں نيوفاشيســم ءِ رستـری هلگرءَ هپتاد ءُ هپت ( ۷۷ ) بے ميار ءُ بے گناهيـں انسان شهيــد ءُ يک سـد ءُ پنجاه ءُ سئـے نپــر ( ۱۵۳) زدگ ءُ ٹپــی بوتــنت. گوستگيں دوازده روچانی درگت ءَ ۲۲ جولای ءِ هلگرءِ تک ءُ پهناتاں گيشتــر پدر بوتگ انت.
کم کم زاهر بيگا انـت که آ بلاهيــں بمب ءُ ليبرپارٹی ءِ ورنايانی کشتارکه مـاں نروژءِ راجدپترءَ بے دروريں رستری ات تهنا يک بزدليـں فاشيستے ءِ کار نهنت. پــدر ءُ سهــرا بؤگاينـت که کٹريــں نازيست « بريويک» ءِ پگری رهنمـا هيتلرءِ جند انـت. البــت انگريز ءِ زات ءُ زريات پرستيـں عيسايی تروريست ، جرمنی ءِ نيونازيست، سوئد ءِ فاشيست ءُ نروژ ءِ جاهليں عيسايی زريات پرست چه «بريويک» ءِ انسان کشی ءَ رازی ءُ باز هــُـژنود انــت.
« بريويک» گوشيـت که آ ۲۲ جولای ترور ءُ کشتار ءِ زمه وارانت. آ لوٹيت که اروپاے ءُ عيسايی دين ءَ چه مسلمانانی دست ءَ به رکينيت. په چشیں مکسـد ءِ رسگ ءَ اروپاے ءِ واکداران اولسرا کشگ به بنت! پر چا که همش ءُ گيشتر سوسيال دمکراتانی سياستانی نتيجه انت که مسلمان هجرت کتگ، آتکگ ءُ مگربـی اروپايی ملکاں جاهمنند بوتگنت.
فاشيستيـں « بريويک» يک سياهگـے ۲۲ جولای ءَ پيش چه بمبی هلگـر ءُ مان « اوت اويا» انسان کشی ءَ اينترنت ءِ سرا شنگ کتگ . ماں هما نبشتانک ءَ آتکگ که مسلمانان ءٌ اسلام، اروپايی کومانی دود ءُ ربيدگ ءُ عيسايی دين ءَ زوال کنگاينت ءُ آ وتا را اروپاے ءِ رکينوک زانت!
آ نـه سال گـوں وتی برنامه يان کار کتگ تنکه نروژ ءِ ليبرپارٹی ءَ سريں پروش بکنت ءُ په کشگ ورنايانی ديما بداريت تنکه ليبرپارٹی ءِ باسک مه بنت.
«بريويک» هم پگر ءُ چه آيی ءَ کـلان تريـں فاشيست ايش انت: « فيورد من» چه نروژءَ «ريچارد» چه انگلستان ءُ «رابرت سپنسر» چه امريکاے ءَ . اگاں مسلمان ءُ اسلام ءِ لبزاں چه « بريويک» ءُ آيی ءِ هم پگرانی نبشتانکاں در کنگ به بنت ءُ يهود ءُ يهوديت اير کنگ به بيت گـڑا گندگ بيت که هيتلر ءِ زات ءُ زريات پرستی ءُ پوستگيـں فاشيستـی پگـر پـدا مـاں اروپاے ءَ تالاں بيگاينت.
اگاں چـه مگربی اروپاے ءِ ملکاں آزات انت ءُ دمکراتيکيں رهبندانی سرا اداره بيگاينت بلئے انگت ءَ چه زات ءُ زريات پرستی ءَ نيمــون زدگ انـت. دلگوش گور کنگی گپ ايش انت که اے نادراهــی ءُ نيمــون وتا را اے رندا نئے چه جرمنی ءُ نئيکه چه انگلستان بلکيــں چه امن پسند ءُ سرآگاهيـں نــروژ ءَ زاهــر کــت.
اے دؤر ءِ نيوفاشيسـم ءُ زات ءُ زريات پرستی ءِ ديما سوسيال دمکراسی، زانتکار ءُ سرپدیں مهلوک ءُ زمه واريـں ديمروی پسنديـں مچـی ءُ هوربند گــوں گـپ ءُ تران ءُ زانـت ءُ سرپــدی ءِ تالاں کنـگ ءَ داشت کت کننت. هميش انت که گـوں وتی مهلوک ءِ همراهی ءَ تواننـت په اے کهنگيــں نادراهـی ءَ جوانيـں چاره ءُ تدبيـر دربگيجنـت.
No comments:
Post a Comment