ھندو ءُ مسلمان- سیاھگ: علی رئیسی

مسلمانیں مردے ءَ ھندویے درچکے ءِ چیر ءَ گُرّ ءُ نِھِرّاں مان بستگ ات ءُ گوشگ ءَ ات : شما ھندواں شرم نکن ات دار ءُ ڈوکیں بتاں سجدہ کن ات .سجدہ واجہ ھدا ءَ زیبیت. ھندو ءَ پسّہ دات اگاں ما بتاں سجدہ ءُ رام رام کنیں شما گِلیں چارسرو کیں لوگے ءَ سجدہ کن ات. مسلمان ءَ وتی ٹیلگ گِرد کت انت ءُ مُشت برزادی کت ءُگوشت کتام لوگ ءَ تو گش ئے؟ ھندو ءَ پسہ دات خانہ کعبہ ءَ گوشاں .مسلمان ءَ گوشت آ واجہ ھداءِ لوگ انت.ھندو ءَ پسہ دات بت ھم مئے ھدا انت . ھندو ءَ وتی دست مسلمان ءُ مسلمان ءَ وتی دست ھندو ءِ گُرّءَ سکّ کت.برزکدءُ کوریّں سِکّے کہ ھما نزیک ءَ اوشتاتگ ات ءُ آیانی گپّ اشکتگ اتنت نزیک ءَ آتک مسلمان اینگُر ءُ ھندو آنگُر تیلانک دات ءُ گوشت اداں ھندوستان انت ءُ دنیاءِ مستریں دموکراسی . اے ملک ءَ عیسی پہ دین وت ءُ موسی پہ دین وت .اگاں دگہ برے من اے ڈولیں گِرءُ کش چہ شما دیست من وتی پیگمبر گرو نانَک ءِ دینی رھبند ءَ یلہ دیان بزا ن وتی سر ءِ مود ریش ءُبروت بگلیگ ءُ آ دگہ چیرپناھین موداں سایاں ءُ شما دوئنیاں پہ سائتگیں مودان ھمے درچک درنجاں

ھیچان وبلاگ ءِ مڑاداریں وانوک ءُ چاروکاں : من چہ لھتے دزگٹیّانی سوَب ءَ ماھے ءُ کپّے بیت کہ گوں شما دیوان نکتگ .نوں پدا پہ بلوچی زبان ءِ دیمروی ءُ بود ناکی ءَ گوں وتی کنٹیں گامان دیم ءَ روان بیاں. بلوچی مئے وتی شھدیں زبان انت . پہ بلوچی زبان ءِ گار نبیگ ءَ بلوچ ندکار ءُ زانتکار وتی ند ءَ گیشتر بچوکین ات ءُ دژمن ءَ موہ مدئیت کہ مئے ماتی زبان ءَ گار بکنت. منی بیگواھی ءُ گاری ءِ وھد ءَ باز چست ءُ ایر دنیا ءَ بوتگ کہ زانتکاراں شنگ کتگ انت

واجہ معمر قدافی ءَ وتی چل سال بادشاھی ءِ دھل ءُ سرنا کت. آ کلاہ واجہ ءَ رند چہ بازین سالاں کہ لاکربی ءِ مرتگیں مردمانی ھون بھا دات انت ءُ وتی اتمی بگربدار ءُ دارو درمان امریکہ ءَ دات انت آئی اش اجازت دات کہ نیویورک ءَ سازمان ملل ءِ کار گس ءَ بروت . واجہ ءَ اوداں یک ساھت ءُ نیم وتی ھما پیشی وڑیں بدوئی گپ ءُ تران کت انت . آئی ءِ وتی ھاسیں رجانکار ءُ مترجم ءَ دم بُرت ءُ دگہ رجانکارے آئی ءِ جاگہ ءَ نشت.اے کرنیل کہ مروچاں گیشتر بدوئی کلاہ سر ءَ کنت عربانی رمب ءَ ھما یکیں مرد انت کہ صدام ءِ درنجگ ءَ رند سے روچ ءَ آئی ءِ سوگ داشت.چنت ماہ ءَ پیش کہ پاریس ءَ آتکگ ات سرکوزی ءَ اجازت دات کہ وتی شاھی تمبو ءَ الیزہ ماڑی ءِ کش ءَ بجنتءُ وتی وشرنگیں جنین کاڑاں کہ آئی ءِ حرس حاس انت تمبو ءِ چپ چاگرد ءَ بہ اوشتائینیت ءُ وتی ھشتر ھم آورتگ ات کہ سھب ءُ بیگاہ آئی ءِ شیران بتنگیت.البت آئی ءَ اے لوٹ چہ امریکہ ءَ ھم کتگ ات کہ وتی تمبو ءُ بگر بداراں سازمان مللءِ ماڑی ءِ کش ءَ لکّ بکنت .بلے سیاھیں اوباما ءَ آئی ءِ اے لوٹ نمنّ ات. تونی بلر کہ اولی رند ءَ آئی ءِ گندگ ءَ لیبی ءَ شتگ ات آئی ءُ بلر ءِ گندنند تمبو ءَ بوت ءُ ھشتری شیر ھم وارینت

ایرانی ملایانی رئیس جمھور احمدی نژاد ءَ کہ وتی گپ ءُ تران بنگیج کت دنیا ءِ بازیں پیشونک ڈنّ ءَ درکپت انت کہ تھنا چنت واریں ملکانی پیشونکان آئی ءِ بے پکاریں ھبر گوش داشت انت.آئی ءَ پدا گوشت کہ امام زمان کیت ءُ دنیا ءَ امن ءُ امان کنت بزان ھما بچلک کہ ١٣٠٠ سا ل ءَ پیش کوفہ ءَ پُگلان وارتگ ءُ چہ جمکران ءِ چات ءَ کہ قم ءِ نزیک ءَ انت درکپیت . ھو ایرانی پہ تئی تمدن ءُ فرھنگ ءَ ؟؟؟؟ءُ ملا خامنہ ای اوباما ءَ چمسُھر دیگ ءَ انت کہ من گوں پلاستیکی دست ءَ تئی دپ ءَ جناں ءُ سی سال انت کہ بھادرین امریکی چہ ایرانیاں ترسگ ءَ انت کہ پلاستیکی دست امریکہ ءَ تباہ کنت

بلوجانی نوکیں ھالے ایش انت کہ احسان ارجمندی کہ نروژ ءِنندوکیں ءُ پہ ترتاب ءَ پاکستان ءَ شتگ پاکستانیاں گپتگ لٹ کٹ کتگ ءُ گوں دگہ ١۵ بلوچ ءَ ایرانی ملایانی دست ءَ داتگ

ماھتاک بلوچی کویٹہ ءِ شونکار واجہ عبدالواحد بندیگ ءَ وتی روچگانی ماہ لندن ءَ ھلاس کت ءُ پنچشمبے یک اکتوبر ءَ دیم پہ کویٹہ ءَ شت . لھتے چہ لندن ءِ بلوچاں گوں آئی ءَ گند نند کت ءُ بلوچی ءِ چندہ دات ءُ باز کس ءَ دپی سلاھے ھم نجت ءُ وشاتک ھم نکت. بلوچی مئے وتی شھدیں زبان انت . بلوچی زندگ بات
Source: Hichaan.blogspot.com