مشرقی بلوچستانءِ پولیسا 11 إیرانی کماندار گوں سلاحاں ماں ماشکیل دستگیر کت أنت و آوانءِ دو گاڑی پچ گپت أنت۔ دوئیں گاڑیاں سوار إے إیرانی کماندار بے إجازتا مشرقی بلوچستانءَ پُترتہ بیتگ أنت۔ ھندی پولیس شہ إیرانی کمانداراں پٹاسکاری کنگا إنت۔أسوسی أئٹد پرئسءِ ردا کماندار فورس إیرانءِ ڈڈتریں واک حساب أنت کہ إیشانءِ سروکیا ملکءِ مذھبی پیشونک آیت اللہ خامنہ إی کنگا إنت۔ ھمے فورسءِ چیردستیں سروک ھفتگےءَ پیئسر ماں پیشن یک جانفدا بیڑےءَ کشگ بیتگ أت۔ گوں آئی دگہ لھتے گچینی سر هم بیران بیت أنت۔
چدا پیسر ھم إیرانی واکدار مشرقی بلوچستانءَ پُترتگ أنت و بازیں رنداں شہ اودا بلوچ إش دستگیر کتگ؛ گوں وت برتگ أنت۔ لھتے براں وتی مخالفیں بلوچ إش ھمانگو کشتگ؛ دئور داتگ أنت و وت سلامتیا إیرانءَ سر بیتگ أنت۔
مشرقی بلوچستانءَ إیرانءِ نوکتریں دستمانجنییےءِ سببا سئے جنیں آدم ماں ماشکیل شھید کنگ بیتگ إتنت۔ إے جنیں آدم إیرانءِ دئور داتگیں یک راکٹےءِ آماچ بیتگ إتنت۔ پاکستانی واکدار إے باروا أنگت بے توار أنت۔
Source: www.balochinews.com
No comments:
Post a Comment