نشنل پارٹیءِ سروک داکٹر مالک و ھلری کلنٹنءِ گِدار

نشنل پارٹی و دگہ سیاسی گلانءِ سروکاں ماں إسلام آباد گوں ھِلری کلنٹن گدار کت۔ ھر یک لیڈرا پاکستان و کش گوَری جاورانءِ سرا وتی لیکہ ھلری کلنٹنءِ دیما بیان کت أنت۔ آدگہ پاکستانی لیڈرانءِ چپ داکٹر مالک بلوچءَ دمگا أمریکائی پالیسیانءِ پلانگری زُرت۔

روچتاک توارءِ ردا پھکیں گلاں أمریکاءِ ڈرون بیڑ إیر جتگ أنت۔ ألبت نشنل پارٹیءِ سروکا تچکا تچک گشتگ کہ إے حملوانءِ برکتا کٹریں ٹرورسٹ شہ راھا دیر کنگ بوت کن أنت۔ إیشیءِ کشا 'کیری لوگر بل'ءِ پلانگری ھم داکٹر مالکءَ زرتگ۔

کیری لوگر بل پاکستانءَ کمک دیگءِ یک قانونے إنت کہ أمریکاءَ منـّتگ۔ إے قانونءِ ردا آیوکیں پنچ سالاں ھفت و نیم بلین ڈالر (هر سالا یک و نیم) پہ غیر فوجی کارانءِ گيشنگا پاکستانءَ رسیت۔ داتگیں زر أمریکاءِ گچین کتگيں جاگھاں خرچ کنگ إبیت۔ پاکستانی فوج و دگہ واکدار إے قانونءِ خلافا أنت۔ پرچاکہ فوج وتی تبءِ ھمردیا إے إمدادی زرّا وارت نہ کنت۔

أمریکاءِ پالیسیانءِ پلانگریا زیرگ داکٹر مالکءِ دیر چاریءِ نشانی إنت۔ پرچاکہ بلوچستانءَ شہ فوج، طالب و ألقائدہ دروشمیں کٹران سک باز خطر ھست إنت۔ کیری لوگر بل و ڈرون بیڑ إیشانءِ دیما دارگ و یا نزور کنگءِ إیوکیں راہ أنت۔
Source: www.balochinews.com