ایران و پاکستانءِ مذھبی کٹراں راجپھاز و آزاد خیالانی خلافا ھؤریا جھد کنگءِ شئور بست

ایران و پاکستانءِ مذھبی کٹراں راجپھاز و آزاد خیالانی خلافا ھؤریا جھد کنگءِ شئور بست

پاکستانءِ مذھبی گل 'جماعت اسلامی' و ایرانی ملایاں ماں مشرقی بلوچستانءِ بنجاھی شھر کوئٹہ یک دیوانے برجم داشت. ایشاں راجپھاز و آزاد خیالیں مردمانی خلافا ھمدستیا جھد کنگءِ شئور بست۔ گشت اش کہ آزاد خیال و راجپھازاں چاگرد بے پلگار کتگ۔ پہ چاگردءِ پلگار کنگا اے وڑین مردماں ولگوَج کنگ ضرورت مارگ بیت۔

روچتاک توارءَ شنگ بیتگیں حالا داتگ کہ جماعت اسلامیءَ ایرانی ملا نذیر احمد سلیمانی و عبدالرحمان عارفیءِ شرفا دیوان برجم داشتگ۔ مھمانانی کشا جماعت اسلامیءِ عبدالمتین آخوندزادہ و عبدالحق ھاشمیءِ ھمراھیا دگہ بازیناں گوں دیوانا تران کتگ۔

اے درگتا ایرانی ملایاں گشتگ "اسلام زند گوازینگءِ یک سرجمیں راھبندے انت۔ جمھموری رواج شہ ایشی بُرزتر نہ انت۔ مغربی ملک کہ جمھوری رواجءِ ردوم دیگا تکشگا انت، بندرا شہ اسلامءِ رشت کنگا ترسگا انت۔ مارا ٹکراں بھر کنگءِ بنی سبب ایش انت کہ مئے آسراتیاں دستگرگا واھوک انت۔"

ایرانی ملایاں جماعت اسلامی ستا دات و آئی اش الکاپیں اسلامی گلے منّ ات۔ گشت اش کہ امت مسلمہءِ جیروانی ٹھینگا جماعت اسلامی پہ سِتک جھدا انت۔

جماعت اسلامیءِ ملایاں گوں دیوانا وتی تراناں گشت "آزاد خیالی، راجپھازی و فرقہ پرستیا چاگرد سراماد کتگ و مسلمان اش بھر کتگ انت۔ پمیشا ابوالعالا مودودیءِ باورانی ھمردیا پہ امتءِ تپاک کنگا میانملکی جھد کنگ ضروری انت۔"

اے وھدی آزاد خیالیں بلوچ راجپھازانی راھدربریا ایران و پاکستانءِ اسلامی سرکارانی خلافا آزادیءِ جنزے برجاہ انت۔ ایران و پاکستانءَ شہ بیستمی قرنءِ اولسرا بلوچستان آوار جتگ۔ بلوچانی اے جنز پہ دوئیں ملکانی زوراکیں سرکاراں خطرے جوڑ بیتگ۔ ایشی کشا ھما کٹر کہ 'خلافت'ءَ پدا آرگ لوٹ انت، شہ بلوچانی جنزا ترسگا انت۔

حیرانیءِ گپ ایش انت 32 سال انت کہ ایران ملایانی دستا انت۔ اے سالاں ایرانءَ نشہ و گندہ کاریاں ردوم کتگ۔ بدیں رواجءِ سببا مردم ھم شہ اسلامءَ بد دل بیتگ انت۔ ھمے حالا پاکستان انت کہ سرجمیں سلـّیانی بنجاہ زانگ بیت انت۔

البت، ایرانی سرکار ھمے وڑیں گِدارانی وھدا ملکءِ بھا کتگیں تیلءِ زرّاں شہ مچّے ماں دریں ملکاں درگپتگیں وتی ھمخیالیں مردماں رسینیت۔ ھر ھما گل کہ امریکاءِ دشمن زانگ بہ بیت، ایران آئیا کمک کنت۔ جماعت اسلامی اے وھدی امریکائی سفارتکارےءِ خلافا یک جنزےءَ سروکی کنگا انت۔ ریموند ڈیویس نامیں اے سفارتکارءِ سرا دو پاکستانیاں کشگءِ میار لڈگ بیتگ۔ دوئیں پاکستانی ماں لاھور کشگ بیتگ انت۔

http://www.balochinews.com/2011/02/blog-post_13.html


سیاھگءِ انگریزی