روچتاک توارءِ ردا محمد أرجمندی گشتگ کہ پاکستانءِ بندیگیں آئیءِ برات إحسان أرجمندی اودءِ واکداراں إیرانءِ دستا داتگ۔ آئیا ترس درشان کت کہ إیران آئیءِ براتا کشیت۔
إحسان أرجمندی کہ ماں مشرقی بلوچستان ترّ تابءِ درگتا 7 آگست 09 پاکستانی چاریگاں دستگیر کتگ أت، بُندرا مغربی بلوچستانءِ نندوکے بیتگ کہ بازیں سال ساریا ناروےءَ شتگ و ھمودی نشنالٹی ئی گپتگ۔
محمد أرجمندیءِ گشگ إنت "إیرانی واکداراں شک إنت کہ إحسانءَ گوں أمریکائیاں نزیکی بیتگ، پمیشا شہ پاکستانءَ آئیا لوٹوک بیتگ أنت"۔
ألبت گوں أمریکائیاں إحسانءِ نزیکیءِ خبر محمد أرجمندیءَ دروغے بیان کتگ و دیمترا گشتگ کہ آئیءِ برات بلوچانءِ سرا زوراکیانءِ إیرجنگا سرجم بیتگیں مچّیاں ألمـّا گوں بیتگ۔
ترانگ بہ کپ إت کہ چدا پیسر پاکستانءِ بندیگیں بازیں بلوچ اودءِ واکداراں إیرانءِ دستا داتہ بیتگ أنت و إیشانءِ نیاما إیوکا إمبری 9 کس پاھو دیگ بیتگ أنت۔ ألـمّا إے کارکرد میان اُستمانی قانونانءِ خلافا إنت۔
میان اُستمانی قانون یک بندیگےءَ دگہ ملکےءِ دستا دیگا پیسر گوں آئیا إنصاف بیگءِ ضامنیا لوٹ أنت۔ ھر کس زانت کہ إیرانءَ پہ بلوچاں إنصاف ناروا لیکگ إبیت۔
إحسان أرجمندیءَ إیرانءِ دستا دیگءِ کارکرد بلوچ نشنل فرنٹءِ سریں جھدکاراں إیرجت۔ إیشانءِ نیاما عصا ظفر، جلیل ریگی، زاھد بلوچ، داکٹر بشیر عظیم، صادق رئیسانی و أنور بلوچءِ نام شنگ بیتگ أنت۔
نام گپتگیں راھشوناں شہ دنیاءِ قوماں لوٹ کتگ کہ وتی إنسانی ذمواریاں أدا کنگءِ پڑا بلوچانءِ نسلاں کشگءِ خلافا توار چست بہ کن أنت۔
Narrated in Balochi by WG
No comments:
Post a Comment