بابائے بلوچستان میر غوثی یادا تربتءَ دیوانے دارگ بوت

شہ نشنل پارٹیءِ نیمگا بابائے بلوچستان میر غوث بکش بزنجوءِ یادا ماں تربت یک پچیں دیوانے دارگ بوت۔ پچیں دیوانا بازیں مردم آتکگ إتنت۔

گوں دیوانا نشنل پارٹیءِ سروک داکٹر مالک بلوچءَ گشت کہ بلوچ سرزمین شہ ھر گورا أنگرّ کنگ بیتگ۔ یک دیمےءَ إیران و دگرےءَ أفغانستان و سئمے نیمگا پاکستانءِ پنجابی نوکر شاھی إنت۔

ألبت، داکٹر مالک بلوچءَ گشت، نشنل پارٹی کہ بلوچءِ قومی حق و وسایلانءِ سرا بلوچءِ واکداریءِ لوٹا دیما برگا إنت؛ گوں سیاسی ڈاھی و اُستمانی زؤرا دشمناں پرؤش دات۔

آئی گيئش کت "بلوچستانءِ شھیدانءِ خلافا 'نازیبائیں' گال درشان کنگ قومی گناھے إنت۔ نشنل پارٹی شھید غلام محمد بلوچءِ ھؤریا سرجمیں شھیدانءِ جھدا ستا دات۔"

حاصل بزنجوءَ ماں وتی گپاں درشان کت کہ نشنل پارٹیءَ گوں ھچ گلا دشمنی نیست إنت۔ گلا وتی 'وژنے' ھست إنت کہ إیشیءِ بنھشت غوث بکش بزنجوءِ فلسفہءِ سرا إیر إنت۔

داکٹر عبدالحئی بلوچءَ درائینت "أبید شہ بلوچ قومی آزادیا پہ ما دگہ درے پشت نہ کپتگ۔ أگر پنجاب مارا غلام دارگا واھوک بہ بیت، گڈا بہ زانت کہ إیشی پہ آواں یک وابے إنت۔ پرچاکہ بلوچ قوما ھچبر دگرءِ غلامی قبول نہ کتگ"۔

روچتاک إنتخابءَ شنگ بیتگین حالا گیئش کتگ که دیوانءِ دیما طاھر بزنجو، داکٹر یاسین، بی إس اوءِ سروک حلیم بلوچ، ربنواز شاہ، رحمت بلوچ، و دگہ کساں ھم تران کتگ۔

دیوانءِ دیما پدّر کنگ بوت کہ غوث بکش بزنجو یک فکرے إنت کہ سیاسی سرپدیءِ درؤشما زندگ إنت۔ ھمائی فکر و فلسفہءِ ھمردیا مروچی نشنل پارٹی وتی قومی ذمواریاں گيشینگا إنت۔

لایق دلگوشیں گپ إیش أت کہ 'سرکاری لیویز فورس' نشنل پارٹیءِ دیوانءِ پھازگا گاٹ دیگا نہ بیتگ۔ دیوانءِ رستگاری ذمواری گلءِ وتی جھدکاراں گوں بیتگ۔
Source: www.balochinews.com