زاھدانءَ بے سیمسریں داکٹرانی درمانجاہ بندگ بوت

ایرانی واکاں حکم دات کہ ‘بے سیمسریں داکٹر‘ ماں زاھدان وتی جوڑ کتگیں دو درمانجاھاں بہ بند اَنت۔ اے درمانجاہ سال 2001ءَ جوڑ کنگ بیتگ اَنت و ھماتانی ادا ھندی نیزگار و افغان مھاجر دوا درمان کنگ بیتگ اَنت۔ نام گپتگیں میانملکی بنجاھا وتی تالان کتگیں حالےءَ مردم سھیگ کتگ اَنت کہ ایرانی واکاں آواں حکم داتگ کہ زاھدانءِ درمانجاھاں رسگا بہ بند اَنت۔

اے درمانجاھانی برکتا ھر ماہ کساس پنچ ھزار افغانی و زاھدانءِ میتگ شیر آباد و کریم آبادءِ نیزگاراں دوا درمانءِ آسراتی رسگا بیتگ۔ شہ اے آسراتیا سوبمند بیتگیں مردم گیشتر لاپ پریں جنین و زھگ بیتگ اَنت۔

شہ بے سیمسریں داکٹرانی نیمگا کارینا گیلانیءَ گشت ”مارا امید اِنت کہ چدا پد سرکاری درمانجاہ ساریا مئے گورا آتکگیں نادراھاں دوا درمان کن اَنت۔ پیسرا ھم سَکّیں نادراہ ما سرکاری درمانجاھاں راہ داتہ بیتگ اَنت۔ البت مارا ترسیت کہ نیزگاریءِ سببا بازیں کس سرکاری نادراھجاھانی خرچاں موکِت مہ کن اَنت۔ لھتے ھنچوشیں مردم ھم ھست کہ سرکاری نادراھجاں رَوگا تُرس اَنت“۔

ایرانی واکاں شہ طالبان سرکارءِ پرؤشگ بیگا رند تانگہ 75 ھزار افغان مھاجر پدا چَھر داتگ اَنت۔ ایشیءِ کشا واکانی سرا بُرتگیں سلاحبندیں بیڑانی سببا 2007ءَ درملکی مردم بلوچستانءَ روگا مَھْن کنگ بوت اَنت۔ شہ ایشی رند سرکاری واکدار یکّوئی بے سیمسریں داکٹرانی درمانجاھاں بند کنگءِ رندا بیتگ اَنت۔

حال راڈیو فرداءِ منّتا۔

http://www.zrombesh.net/