بلوچ بزانت که ایرانءِ دمکراسیءِ کاروان هچبر منزلءَ سر نه بیت

گوستگیں جمعه بزاں 12 جونءِ گچین کاری و الیکشنءَ رند، شش روچ-انت که ماں ایران مهلوک چست بیتگ و رژیمءِ ووٹ دزیءِ خلافءَ تظاهرات کنگ-انت. سیاسی جهدکار پیتر تاچلءِ همت و گوانکءَ، پنچشنبهءِ روچءَ هم ماں لندنءِ شهر، ایرانءِ سفارتءِ دیما په دمکراسی، ایرانی جماعت و لهتی شه طرفداران دمکراسیءَ تظاهرات و مچی کت.

من هم وهدے که اے حالءَ شه پیتر تاچلءِ ایمیل سرپد بیتں، گوڈءَ گوں وت شور کت تا المیءَ مان اے مچی بهر بزیراں و وتی همدریءَ گوں ایرانی جهدکاران که په دمکراسی ایمانش هست، شون بدیاں. پیش چی روگ، منءَ اوپار نه-بیت تا ماں اے مچی و تظاهرات که دنیاءِ میدیا بزاں ریڈیو و ٹی- وی کاینت، شہ بلوچ مظلوم و اعدامیاں، پوسترے مه-براں. وتی زهگانءَ من کـڈن کت تا شه منی فایل، ای عکس بزان سئیں بلوچانی عکس که دو هپتگ پیش ماں دزآپ، ایرانءِ ظالمین رژیمءَ په نگیگیں پیمی پاهو داتگ-انت، در بکن-انت و آییءَ مزن و سرے بنبیسنت که Baloch killed in public by IRAN.

من اشتاپ اشتاپیءَ دیم په چاپءِ دکان رهادگ بیتں و دو کسانیں و یک مزنیں پوسترے چاپ کنائینت. شه چاپءِ دکان دیم په تظاهرات رهادگ بیتں و وتءَ را په مچی سر کت.

لهم لهمءَ من گوں مچی هوار بیتں، و بلوچ اعدامیانی پوستر برز برزءَ وتی دستان گپت و اوشتاتں. چنت دمانءَ رند من دیست که میدیا بزان ٹی وی و فوٹوگرافر شه مئی بلوچانی اعدامءِ پوستر که من داشتگ-ات، توجه کنگ-انت وعکس و فیلم گِرگ-انت. منی راستی کشءَ کسان سالیں ایرانی بانوکے که اسلامی پوچانی تها-ات، اوشتاگ-ات و په ووٹانی دزیءِ خلافءَ پریات کنگ-ات. چی جوش و پریاتءَ رند، اناگاهءَ، اے دُردانگیں بانوکءِ هژار و تیزیں چم په همے بزگین بلوچانی پوستر که ایرانءَ چو بے-وسیں مرگاں درتگ-اتنت، کپت. اے پوسترءِ سرا نبشتگ "ایرانءَ، بلوچ سرعام کـُشتنت". ایرانی بانوکءَ دیست که ٹی وی و فوٹوگرافرانے توجه په اے پوستر-انت، سک په درد بیت و وتی اعتراضے گوں من پیش کت، بزاں من ایرانءِ، بلوچانی سرا ظلم و قتل و کشتاراں دنیاءِ دیما پدر و ظاهر مه-کناں. ایرانی بانوکءَ ترندیءَ گشت که اے پوسترءَ، شون دئیگءِ اجازت نیست. من پسو دات که اے پوسترءَ هچ دروگیں یا نه-وشیں گپ په اے تظاهرات نیست، و اے تظاهرات و مچی هم په دمکراسی ماں ایران-انت. بایدنت که شما مئے بلوچانی اعدام بئیگ و کـُشت و کوشءِ خلاف ببئیت، په اش که بلوچانی سرا زوراکیءِ مسئله هم گوں ایرانءِ دمکراسی همگرنچ-اِنت. ایرانی بانوک که گوٹے په آزادی و دمکراسی درتگ-ات، زهرءَ پُـر بیت و حکمے کت که من شہ تظاهرات در بیایں. ایرانی بانوکءَ گشت که شما بلوچ، ایرانءِ نزور کنگ و ایرانءِ پروشءِ کوشستءَ-اِت. آییءَ حکم دات تا من بانوکءِ کشءَ مه-اوشتاں، و گـُشتی که آ نه-مَنیت تا آییءِ عکس گوں مئے بزگیں بلوچ اعدامیانی پوسترءَ گندگ ببیت. من پسو دات که شما وتءَ را زوراکیءِ خلاف زانِت، اچے چه پیم اشیءَ په وتی شان عیب زانِت که شمئی دردانگین عکس گوں ما مظلومیں بلوچاں بکپیت. ایرانی بانوکءَ گـُشت که آ په ایرانءِ یونیٹی و یک جهتی جهد کنگ-انت و اے پوستر بلوچءِ مسئلهءَ پیش کنت. من په آیی گـُشت که شما اگر بلوچان ایرانی نه-زانِت، گوڈءَ تچک تچکءَ ای گپءَ بگـُشیت تا هر کس بزانت و پوه ببیت. ایرانی بانوکءِ دیم ترندتر بیت و شه منے کش شوت تا تظاهراتءِ سربراهاں سر پد بکنت که بلوچ اتکگنت و دنیاءِ میدیا و ٹی وی و فوٹوگرافرانے دیما بلوچانی کشت وکشتاراں گوں سـَـنَد و پوستر شون دئیگ-انت.

دمانے رند، ایرانیانے توار سست و خاموشی بیت و شه بلندگو بزاں لاوڈ-اسپیکر اعلان بیت که لهتے اتکگنت و گوں وتی پوستراں، لوٹنت تا تظاهراتءَ بیراه بکننت. من وهدے که اے گپ اشکت، زانت و گوں وت گشت که ایرانءِ دمکراسیءِ کاروان هچبرمنزلءَ سر نه-بیت. بلے من پدا هم گوں بلوچ اعدامیانی پوستر اوشتاتں، په اش که په من بلوچانی جان و حرمتءِ دفاع شه ایرانءِ ووٹانی سر و چیری بزان دزی، باز مهمتر-ات، اگں که من په ایرانءِ دمکراسی و ایرانی جهدکارانی حمایت و طرفداری شوتگَتں. شہ اعلان و هژار دئیگءَ رند باز نه-گوست که ایرانءِ دمکراسیءِ جهدکارانے نقاب سر- لکُشت و آیانی باطن پدر و ظاهر بیت، و تظاهرات سربراهاں یک مزں و پهلوانیں ورنائے په منے در کنگ شه تظاهرات روان دات. اے ورناءَ سرجناں و بازیں اے دیم و آ دیم چارگءَ رند، منءَ-را ودیهـ کت. ایرانءِ دمکراسیءِ جهدکارا په من گشت که آ شہ اے پوستر بزاں بلوچ اعدامیانی پوستر باز نه-وش اِنت، و منءَ په بیهـ اجازت نیست تا ماں آیانی مچی و تظاهرات ببیاں. من په آرامی گـُشت که مئے بلوچ اعدامیانی پوسترءَ گوں دمکراسی په ایرانءِ تظاهرات هچ تضاد یا مشکل نیست، و شما مهربانی بکن-اِت و اجازت بدئیت تا من اے پوسترءَ بدارں و شمئے همراهیءَ ایرانءِ ظلم و زوراں پاشک و پدر بکناں. آ بزان تظاهراتءِ سربراه و ارگنائیزر کنوک وهدے که بےدلیل و بےجواب بیت، شہ زهرءَ ترکگے بیت و حکمے دات تا من بےمعطلیءَ، شہ آیانی تظاهرات و مچی برواں. گوں وتی حکم، آییءَ پلیس گوانک جَت تا منءَ را بگـُشیت، من نه-تواناں ایرانءِ دمکراسی تظاهراتءِ همراه ببیاں. پلیسءَ مئے بلوچ اعدامیانی پوستر چار-اِت و نبشته ونت. من گوں پلیس گـُشت، اول اش که منءَ را واجہ پیتر تاچلءَ په اے تظاهرات لوٹائینتگ و پیتر اصلی ارگنائیزر-انت و دگہ اش که اے تظاهرات و مچی په ایرانءِ دمکراسی-انت، و اے پوسترءَ بید چی بلوچانی سرا ظلم و اعدام، په اے تظاهرات هچ رد و جنجالی گپ نیست. معذوریں پلیس سرپد بیت و گوں من گـُشتی که آ شہ ارگنائیزرانے گپ در بیت نه-کنت، اچ بهتر اِشنت تا من وتی راهءَ بگراں و شہ اے ایرانیانے تظاهرات برواں. من هم وتی پوستر زُرت و شہ در-آئیگ پیسر لوٹت تا گوں وتی دوست ڈاکٹر عبدالستار دوشوکی رُسکتے بکناں، بلے ایرانءِ دمکراسی پانک جنوکاں، پلیس گـُشت، و مئی رُسکتے هم په شرے نه-بیت.

اے نبشتانکءَ من په اش نبیسان تا بلوچ په شرے و دلءِ ستک بزان-انت که ایرانی جماعت شه دمکرات و غیره، بلوچ کومءَ وتی گلام زاننت و په بلوچءِ درد و رنج آیاں بزاں ایرانیاں هچبر نه-پروا بیتگ و نه-بیتش. ایرانی اگہ مروچی په دمکراسی و آزادی و لیبرالیسم و . . . گپ جنت، تیهوکا په وتی ایرانی جماعت جنتی و بس. ایرانی جماعتءَ شون داتگ و ثابت کتگ که ماں حتی سخت-تریں شرایط حاضر نه-اِنت تا دمکراسیءَ یونیورسال بزانت و په هر کسے بلوٹیت. ایرانءِ دمکراسی پانک جنوک اگہ ماں دیار غیر و اروپا اے وهدءَ که آیانی نفس کییرکییر کنگ، و بنداِنت، اے اجازتءَ را ما بلوچاں نه-دئینت تا ما آه بکشیں و دنیاءَ بگـُشیں که مئے بلوچانے سرا هم ظلم بئیگنت، گوڈءَ، وهدے که زور و طاقتش بیت، شما وت حدس بجن-اِت و بگـُشیت که مئے بلوچانی عاقبت بهتر بیت یا همے اعدام و لٹ وکُٹ و غلامیءِ لوپ.

ماں ایرانءِ سیاست، سالانی سال-اِنت که من دلگوش کتگ و منءَ جد و جهد بیتگ. من حقیقتءَ شہ ایرانیانی اے پیمیں حرکت حیران و متعجب نئیاں، په اش که اے، بهرے شہ ایرانیانی غرور ملی-اِنت تا هر نیکی و گهتریءَ را په وت نیک بزاننت و گلامیءَ په بلوچ و دگراں روا و ضروری. په اش که بلوچانی ایردستی و گلامی، ایرانءِ یونیٹی و یک جهتیءَ پوره و سرجم کنت. هنوگیں ایرانءِ چست و ایر، ایرانیانی وتی جیڑه-اِنت و مهمتر اش که آیانی برداشت و کانسپت شه دمکراسی چے بنیاد رد-انت، په همش ایرانءِ دمکراسیءِ کاروان هچبر منزلءَ سر نه-بیت، و بلوچ وتءَ را اے خوش خیالیءِ شکار مه-کننت که بلوچانی مسایل ماں دمکراتیکیں ایران حل بنت.

سوبین بات بلوچءِ جد و جهد

عبدالله بلوچ لندن- پنچشنبه 18 جون 2009

http://www.zrombesh.net/