نـوکیـــں دؤرے آيگ انـــت محمـد کريـم بلـــوچ

بلوچستان ءِ کتـه کار ءُ کلانيــں راجی ـ سياسی ءُ سماجی سروکاں ، کـوم دوستيـں نيکراهی رهدربراںءُ بلوچ راج ءِ پسّگ ءُ ورناياں گــوں تپــاکی ءُ يکـــويی تيار بؤگ لوٹيت تنکه آيوکيں وهد ءُ روچاں شـریں پيمے ءَ په رونشتی بلوچستان ءِ مردمـی ءُ دمکراتيکيں سياسی ءُ سلهبندی ءُ مـُـلکداری واکانی هوربند ءُ اداره ياں اڈ کنگ ءُ برجاه به بنت. پميشکا په گـوم ءُ گيـگ اے باروءَ بايد انت پگر ءُ هيال ، هـــوردچاری (هيرت چاری ) ءُ دورچاری به کنین ءُ وتی هيال ءُ ليکه ياں بلوچ مهلوک ءِ آينــده ءُ بلوچستان ءِ باندات ءُ آيوکیں وهد ءِ باروءَ ماں شهــد ءُ شيرکنیں بلوچی زبانءَ به نبيسین ءُ ماں راجی وبسايت ءُ بلوچ دوستیں وبلاگاں شنگ ءُ تالاں بکنیں.

تهران ءِ فاشيستی واکداران ءِ نزورتر بيگ ءِ درگت ءَ آهانی رستری واک ماں بلوچ گلزمين ءَ هم الّــم ءَ سست بيت. واکداريـں زابلی ءُ ڈنّی یں پارس چشیں کارکرد ءُ کارپدے نبوتگ ءُ نيســت که آ وهـد ءَ ماں بلوچستان ءَ جان بيار اَنت. آهاں که زراگ ءِ پيما مئی هون چوشتگ ءُ دتانی پيما مئی گوشت چونڈتگ په يک ءُ دو وَ نه تچنت. آ گلينگ لوٹنت که بيد چه بلوچانی تپاکی ءُ تياری ء گرانيـں کارے بيت. کورد ءُ آذری وڑءَ مارا هم تياربيگی انت.

بلوچ مهلوک ماں هما بهراں (هـُراسان ءُ کرمان ءِ زرباری بهراں، ميناب، جاسک ءُ گيابان) که چه گلزمين ءَ په زور جتا کنگ بوتگنت، هور بيگ ءِ کوشست کنگ به بيـت. آهاں هم سالانی سال په ملک ءُ وتن ( بلوچستان )ءِ آزاتی ءَ جهد کرتگ ءُ کـُربانی داتگ . بيد چه آهانی لوٹائينگ ءُ شامل کنگ ءَ گلزمين ءِ اڑ ءُ جنجالانی گيشينگ پوره نه بنت. گـوں‎ آهانی همراهی ءَ آهری منزل ( استقــلال )ءِ رسـگ زلوری انـت.

بلوچستــان ءِ هداروکــی راجی ديوان ءِ گچيــں بوتگين ءُ زانتکاريــں باسکاں که سجئيں بلوچستان ءِ مهلوک ءَ نمايندگی کننت په بلوچستان ءِ کانود ءُ بن رهبندانی اڈ کنگ ءُ ٹاهينگ ءَ ماں دزآپ يا پهــره ءَ مچ بنــت تانکه ملکداری ءُ دگه سياسی، اجتماعی ءُ اقتصادی مسئله يانی باروا ءَ گپ ءُ تران، ديوان ءُ پيسله بکننت..

بلوچ سرمچاران ءُ هـَنـدی شـوراياں، کوم دوستیـں کماش ءُ راجــی سروکاں په ملک ءِ ايمـنی ءُ آرام دارگ ءَ تاں بلوچستان ءِ راجی حکومت ءِ اڈ بيگ ءَ اگده دار انت.

بلوچستــان ءِ راجــی دیــوان ماں ملک ءِ بنجاهی شهرءُ مچــی ءُ شورایاں ماں بلوچ گلزميــن ءِ شهـرءُ میتــگ ءُ کلگان بلــوچ ءِ مردمی واک انــت.

سرداری ءُ نوابی ءِ مـرتگیں سیستم مئے تاریخ ءُراجدپتر ءِ گوستگیں دورءِ پـُر جنجال ءُ بے سيتیں بهـرے انت.

اگاں چه تهرانءِ بلوچ دژمنیں فاشیست لهتیں ناسرپديـں بلوچ ءِ سرا سرداری ءِ پاگ بستگ ءُ کلاه ایرکتگ

ءُ کوشست کرتگ که مئی ملک ءُ مهلوک ءَ پدا بداریت ءُ مئی دیمروی ءَ به اوشتارینیت بلے بلوچاں ديما چارگ لوٹیت. اداں اے گپ هـم گوشگــی انت که همــا تگارلاپيـں ءُ وت گڑيــں مـلا که پـه بلوچانی لٹ کٹ ءُ کــوم ءِ ايردست دارگ ءَ گــوں ڈنـّی يـں پارس هم کوپگ بوتگ انت ءُ گوں هونواريـں هامنه ای ءَ هم زان انت آ هـم وتی چکـــّاس ءَ داتگ انت. چشیــں مردمـان ءِ کارکـرد په بلوچ ءَ ننــگ انت ءُ آ که مئےکـوم ءُ بلوچستان ءَ تاوانبار کتگ، نئے مستــری ءِ لائک انت ءُ نئے کـه نيکراهی رهبندانی مــؤمـــن ءُ دوزواه انــت.

بلوچستــان ءِ آينــده بلــوچ کوم ءِ هاله ئیں واکــداری ءِ دؤر انت، بلوچستــان ءِ راجــی ديوان ءُ راجــی حکومــت ءُ راجی بــُن رهبنــد ءِ دؤرانت.

آ بلوچ ءُ بلوچ اوبادگاں که پهکدليــں کومـی زانتکار اَنــت ءُ مردم آهانی سياســی يا اجتماعی رهدربری ءَ

به لوٹنت، هـَمــــا رهدربری ءُ کماشی ءِ لائک انت. بلوچستان ءِ آينـــده، کومی ءُ مردمـــی شورا ءُ مچی يان ءِ دؤرانت. هما ديمروی پسندیں مچــّی که په بلوچستان ءِ مهلوک ءِ هکـّان ءُ راج ءِ هاترا سيستماتيکیں وڑے ءَ گـوں زانتکاری ءُ دل پهکـی ءَ جد ءُ جهد به کننت.

پروشت ءُ پروش باتنــت ايران ءُ پاکستان

آزات ءُ آبــاد بات گنجيـــــں بلوچستـــــان

محمـد کريـم بلـــوچ

۱۶ اکتبر ۲۰۱۱