وھد رستگ کہ ایران و پاکستانءِ باروا نوکین راھبندے جوڑ کنگ بہ بیت۔ نوکیں راھبندا اے راستی سرگوَز مہ بیت کہ دویں ملک پہ دمگا خطرے اَنت و وتی دستانی چیرءِ مردمانی آزادیءِ دیم اش پہ زور داشتگ۔ پاکستان و ایرانءِ چیریں پندل گوں پاکستانءِ درملکی مالی و فوجی کمکانی بند کنگا مھتل بیت کن اَنت۔ ھواریا گوں دویں ملکانی (شھری و فوجی تجارت) بند بہ بیت۔ ایشانی کشا دویں ملکانی جھموری واک دل اڈی دیگ بہ بی اَنت، بلوچستانءَ انسانی حق پھازگ و بلوچانی اے حق منّگ بہ بیت کہ وتی ملکا وتواک بہ بی اَنت۔ وتواکیں بلوچستان پہ سرجمیں دنیاءَ فایدہ اِنت و بلوچ پہ ھمے واھگءِ پیلو کنگا جھدا اَنت۔
واجھیں صدر باراک اوباما،
شمئے دلگوشا نگیگیں بلوچانی پادمالیں حقانی نیمگا ترّینگا واھوکیں۔ بلوچستانءِ مردماں زورگریں ایران و پاکستان یکّوئی جَنَگ و لپاشگا اَنت۔ بلوچ ھیومن رائٹسءِ ردا گوستگیں سالاں ھزاراں جھدکار و ھنچونائیں بلوچ بیگواہ کنگ بیتگ اَنت یا روچ رحمان پاکستانی واکاں چست کتگ اَنت۔ ھمے گوَستگیں جمعہ 30 ستمبر 2011ءَ ‘دی نیوز‘ءَ حال شنگ کتگ ات کہ بلوچستانءَ ھر روچ چار یا پنچ بلوچ چست کنگ یا کشگ بیگا اَنت۔
ایران ھم بلوچانی سرا باز زوراکی کنگا اِنت۔ پہ بلوچ جنزءِ پروشگا ایرانءِ انصاف ناپسند و پوستگیں سرکارءِ دستا ھم بے میاریں بلوچانی کشگ بیمناکیں وڑےءَ برجاہ اِنت۔ اودا کشگ بیتگیں بلوچانی یک دراجکشیں لڑے بلوچ ھیومن ڑائٹس اسوسی ایشنءِ جھدکاراں ھمے ھنوگاں شنگ کتگ۔ ھمے لڑ گوں اے کاگدا ھوار اِنت۔
ایران و پاکستان، ھردویں ملک، وتی پت و پیروکی سرڈگارا نندوکیں بلوچانی بُنی انسانی حقاں پادلپاش کنگا اَنت۔ امنسٹی انٹرنشنالءَ وتی ستمبر 2011ءِ رپورٹا ایرانءَ بلوچانی سرا بیوکیں زوراکیانی باروا ناوشی درشان کتگ۔ امنسٹی انٹر نشنالءَ شہ ایرانءَ لوٹ کتگ کہ بلوچستانءَ بلوچانی جاوران نگیگ کنگءِ راھبنداں بہ مٹینیت۔
پاکستان سپریم کورٹ بار اسوسی ایشنءِ صدر عاصمہ جھانگیرءَ یکّوئی شہ پاکستانءَ لوٹِتگ کہ بلوچ جھدکاراں چکانپگ و کشگءِ رواج داتگیں کارا انگار بہ کنت۔ پاکستانی فوجءِ دستا بلوچانی چکانپگ بیگ و کشگءِ کارا مارگءِ سببا عاصمہ جھانگیرءَ گوستگیں ھفتگا شہ بلوچستانءَ فوجا درکنگءِ لوٹ کت۔ پاکستانءِ ھیومن ڑائٹس کمیشنءِ بازیں رپورٹ بلوچ مردمانی انسانی حقانی پادمالیءِ باروا شنگ بیتگ اَنت۔
پاکستانءِ مرکزی و سیمسری فوج بلوچستانءِ ھر کنڈا نادینگ بیتگ، تانکہ بلوچاں شہ (جھانءَ) سر سندیت و پہ رَوایں حقاں بیوکیں آوانی جھدا پادلپاش بہ کنت۔ ماں بلوچستان نندارینتگیں زورگریں فوج گوں بیمناکیں سلاحاں سلاحبند اِنت۔ ھمے سلاح بلوچانی خلافا کارمرز بیگا اَنت۔
پدردیں گپے اِنت کہ پاکستانءَ سلاح و فوجی تربیت شہ امریکاءَ رسگا اِنت۔ تچکیں گپ ایش اِنت کہ پاکستانءَ سلاحبند کنگ، تربیت و مالی کمک دیگءِ امریکاءِ کارکردا بلوچ ایر جن اَنت۔ پاکستان یک گمراھیں ملکے اِنت کہ کمک و سیادیءِ لایق نہ اِنت۔ بلی توریں بیلیناں ڈالرءِ امریکائی کمک پاکستانءَ رسگا اِنت، اے خبر نیں پاشک بیتگ کہ وتی جوڑ کتگیں حقانی گونگیں طالبانی کمکا آ چیرکائی امریکاءَ جَنَگا اِنت۔
آدگہ دیما ایران ھم گوں وتی کٹریں فلسفوا (پہ دنیاءَ) جنجالےءِ اِنت۔ سویلین اٹومک پروگرامءِ ناما ایران جوھری سلاح جوڑ کنگءِ رندا اِنت۔ گوں اے کارکرد پہ دمگءِ امن و سلامتیا بیمناک اِنت۔
بلوچ سرپد اَنت کہ ایران و پاکستان وتی ذمواریاں پادمال کنگا اَنت۔ آ گمراھیں ملک اَنت و بیمناکیں واھگاں رندگیری کنگا اَنت۔ ایشانی بیمناکیں واھگانی اولی پدّریں شکار افغانستان اِنت۔ آوانی خیالا افغانستان شکار اِنت و بلوچستان آوانی جایزیں ملکت اِنت۔
بلوچ سرپد اَنت کہ دمگءِ ایمنی و دیمرویءِ جھدا ایشانی شریداری وتی جاگھا، گوں ایشانی ھمراھی امریکاءَ و آزادیں دنیاءَ مدام بدگوَم کنت۔ امریکاءِ خلافا مردمانی تھا بد دلی پیدا کنگ و امریکا مخالفتءِ ذموار ھمے پاکستان و ایران اَنت۔ وتا مزنتریں امریکا مخالف ملک ثابت کنگا پاکستان و ایران گوں یکّادگرا مقابلہ کنگا اَنت۔ پاکستانءِ مردمانی مزنیں بھرے امریکاءِ دشمن جوڑ کنگ بیتگ۔
بلوچانی بھتاوری اِنت کہ وتا اِش شہ کٹری فلسفہ و کاراں رکّینتگ۔ بلوچانی لیکہ ایش اِنت کہ آوانی مذھب اسلام اِنت، بلہ میانملکی جاوراں سیکیولر راھےءَ رندگیری کن اَنت۔
وھد رستگ کہ ایران و پاکستانءِ باروا نوکین راھبندے جوڑ کنگ بہ بیت۔ نوکیں راھبندا اے راستی سرگوَز مہ بیت کہ دویں ملک پہ دمگا خطرے اَنت و وتی دستانی چیرءِ مردمانی آزادیءِ دیم اش پہ زور داشتگ۔ پاکستان و ایرانءِ چیریں پندل گوں پاکستانءِ درملکی مالی و فوجی کمکانی بند کنگا مھتل بیت کن اَنت۔ ھواریا گوں دویں ملکانی (شھری و فوجی تجارت) بند بہ بیت۔ ایشانی کشا دویں ملکانی جھموری واک دل اڈی دیگ بہ بی اَنت، بلوچستانءَ انسانی حق پھازگ و بلوچانی اے حق منّگ بہ بیت کہ وتی ملکا وتواک بہ بی اَنت۔ وتواکیں بلوچستان پہ سرجمیں دنیاءَ فایدہ اِنت و بلوچ پہ ھمے واھگءِ پیلو کنگا جھدا اَنت۔
ما شہ تو دستبندی کنیں کہ بلوچستانءَ انسانی حقانی پھازگا چیرا داتگیں پڑاں گامگیج بہ بی:
امریکا گوں پاکسانءَ وتی بے ثمریں سیادیءَ بہ سندیت۔
پاکستانی فوجا تربیت دیگ و مالی کمک بند کنگ بہ بیت۔
دگہ پڑاں پاکستانءَ مالی کمک دیگ مہ بیت
گوں امریکائی و دگہ میانملکی واکاں جھادیانی کتگیں جنگءِ حساب شہ پاکستانءَ جست کنگ بہ بی اَنت۔
بلوچستانءَ (پاکستان و ایرانءِ) پادمال کتگیں انسانی حقانی پھازگا گامگیج زیرگ بہ بیت۔
بلوچانی سیکیولر راجی جُنز روا منّگ بہ بیت۔
بلوچ جُنزءِ باروا (حالانی تالان کنگا) میانملکی رسانک دل اڈی دیگ بہ بی اَنت۔
اے خبرا گیشینگ پکار اِنت کہ بلوچ جنزا ردوم دیگ ھژدری اِنت۔ اے جنز ماں دمگا آزادی و دیمرویءِ مزنیں امید اِنت۔ پرچاکہ ایشی تھاریں کٹریءِ دیما اوشتاتگ۔
بلوچستانءِ راجی زرمبش بلوچ مردمانی نیمگا شمئے داتگیں دلگوش و وھدءِ منّتوار اِنت۔
خ م رئیسی
بلوچستانءِ راجی زرمبش
اکتوبر 9، 2011
رجانکار: ولید گربنی
No comments:
Post a Comment