بزنجوءِ لوٹ بلوچستانءِ آزادی و آبادی أت۔ - چمشانک: ولید گرینی

دنیاءِ ھر قومءِ تھا سر ودی بیتگ إنت کہ آوانءِ زندگ بیگءِ مقصد إیوکا وتی قومءِ راھدربری و مردمانی حقانءِ پانکجنی بیتگ۔ پہ ھمے لوٹانءِ پیلو کنگا وتی زند إش گوازینتگ و یا ندر کتگ أنت۔ بلی توریں دنیاءِ آ دگہ قومانءِ ڈولا بلوچاں دیمروی نہ کتگ، بلے بلوچ قوم شہ نایاپتیں سراں زبھر نہ بیتگ۔ إے سراں پہ بلوچ قومءِ آزادی و آسودگیا مدام جھد کتگ۔

وھدے پہ بلوچ قومءِ آزادی و آبادیا جھد کنوکانءِ نام گرگ بہ بیت، گڈا شہ ھر کسا ساری میر غوث بخش بزنجوءِ نام ودی إبیت۔ ھمے سانڈیں نام تاکہ جھدءِ گڈسرا ماں تاریخءِ تاکاں درپشیت۔ مردم أگر إنگریزانءِ درکپگا ساری بلوچءِ منظمیں جھدءِ سرا پؤلکاری بہ کنت، گڈا بزنجوءِ قلات نشنل پارٹی إیوکیں گل إبیت کہ آئیءِ نام درا إبیت۔ ھمے گلا وھدے شہ إنگریزاں بلوچستانءِ آزادی لوٹ إت، گڈا إنگریزاں إیشیءِ سرا بندش جت۔

رندا وھدے شہ ھندوستانءَ إنگریزاں درکپگءِ شوربست، گڈا بزنجوءِ سروکیا قلات ریاستءِ حیثیتا برجاہ دارگءِ جھد پہ سوبینیا رسینگ بوت و 11 آگست 1947ءَ قلات ریاستءِ آزادیءِ جار پرّینگ بوت۔ پہ ریاست مجلسا باسکانءِ گچین کنگا وھدے ووٹ بیت أنت۔ إے ووٹاں قلات پارلمنٹءِ 52 سیٹانءِ نیاما میر بزنجوءِ گل 'قلات نشنل پارٹی'ءَ 39 سیٹ گپت أنت۔ پدا کہ دیوان برجم دارگ بوت، گڈا آ دگہ جاورانءِ سرا گپ ترانا پد پاکستانءِ واھگءِ سرا بحث بوت۔ پاکستانءَ واھِتگ أت کہ قلات ریاست گوں آواں ھؤر کنگ بہ بیت۔ إدا هؤر بیگءِ مخالفت کنوکیں سرانءِ سرؤک إیوکیں میر غوث بخش بزنجو أت کہ دیما آتک۔

وتی گپانءِ تھا میر غوثی گشت " پاکستان مئے ریاستءِ کمزوریءِ عذر پیئش کنگا إنت و گشیت کہ گوں پاکستانءَ ھؤر بہ بیین۔ من گشگ لوٹاں کہ دنیاءَ چنچو ھنچیں ملک أنت کہ آ شہ ما نزور تر أنت، بلے وتی پادا اوشتاتگ أنت۔ دومی سبب کہ پاکستان ظاھر کنگا إنت کہ ما گوں آواں ھؤر بہ بییں، آ مذھب إنت۔ إیشی ھم علمی دلیلے نہ إنت۔ أگر چؤش إنت، گڈا أفغانستان و إیران ھم گوں پاکستانءَ ھؤر بہ بنت"۔

میر غوث بخشءِ همے راھشونیانءِ برکتا قلات ریاستءِ پارلمنٹا گوں پاکستانءَ ھؤر بیگءِ واھگ نہ منّ إت و فیصلہ إش کت کہ ھنچؤکہ گوں ھمساھگیں إیران و أفغانستان‏ءَ قلات ریاستءِ رشتگ أنت، ھمے وڑا گوں پاکستانءَ ھم بہ بیت۔ چدا گیئشتر گون پاکستانءَ نزیک بیگءِ مخالفت کنگ بوت.

شہ إدا مایوس بیگا رند پاکستانءَ گوں پندل و قلات ریاستءِ درامدیں وزیر أعظمءِ کمکا یک یکـّا سرجمیں بلوچ سردار خرید کت أنت۔ پدا شہ لسبیلہءَ بہ گر تا جالاوان و مکران گوں پاکستانءَ ھؤر کنگ بیت أنت۔ وھدے 17 مارچ 1948ءَ بیلہ، مکران و جالاوانءَ گوں پاکستان ھؤر کنگءِ جار جنگ بوت، غوث بخش بزنجو دستگیر و ماں خضدار بندیگجاھا بند کنگ بوت۔ ھمے درگتا کہ میر بزنجو بندیگ أت، قلاتءَ گوں پاکستان ھؤر کنگ پندلانءِ کاگد دست نشان جنگ بیتگ أنت۔

ماں بندیگجاھا بزنجو سھیگ بوت کہ خان قلاتءَ گوں پاکستانءَ ھؤر بیگءِ کاگد دست نشان جتگ أنت، گڈا آئیا درّائینت "خان قلاتءَ نہ إیوکا قلاتءَ گوں پاکستان ھؤر کنگ کاگدانءِ سرا دست نشان جتگ أنت؛ آئیا أیشیاءِ پانزدہ میلین بلوچانءِ موتءِ کاگد دست نشان جتگ أنت"۔

إدا دیدا سئیل کن إت؛ دور چاریا بہ مار إت کہ غوثی گشگا إنت "أیشیاءِ 15 میلین بلوچ۔۔۔" قلاتءِ إنا، بلوچستانءِ إنا؛ أیشیاءِ 15 میلین بلوچ!

شہ ھر نیمگا دروھگ بیگا رند میر غوث بزنجوءَ مار إت کہ آ یک چاگردےءَ زند گوازینگا إنت کہ إیشیا باز سرپدی دیگءِ ضرورت إنت۔ رندا بلکیں آزادیءِ بزانت و أرزشا سرپد بہ بیت۔ پمیشا آئیا پاکستانءِ دستءِ چیرءِ نزوریں قومانءِ ھمراھیا پہ بلوچستانءِ آزادیا اُصولی جھد دیما براں کت۔ ھمدا بہ گندئے گوں پٹاناں نند نیاد کنگا إنت، پدا سندءَ شـُت و اودءِ قوم پرستاں جھدءِ سکین دیگا إنت۔ پدا بہ گندئے سرائیکیانءِ مارشتاں کنـّت کنگا دستگٹ إنت کہ جاہ بہ جن أنت۔ إیشانءِ کشا وتی نواب،

سردار، خان و حاکماں مُچّ کنگ، و قومی سیاستءِ پڑا کشـّگ؛ آرگ ھم برکت میر بزنجو إنت۔

شہ إیران بہ گر تا أفغانستان و روس؛ بزنجو یکـّوئی تچ تاچا بیتگ۔ پہ ھمے زور گرگ بیتگیں سرڈگارءِ رکـّینگا و غلامیں بلوچ قومءِ آزادیا۔ آئیءِ ھر قول و کرد چم پچّانءِ دیما سھرا کنت کہ إیوکیں واھگ ئی بلوچستانءِ آزادی و قومءِ آبادی بیتگ۔ إیشیءِ ثبوت آئی وتی گپ أنت کہ 1973ءَ جوڑ بیتگیں پاکستانی بن راھبندا دست نشان جنگا پد آئیا گشت أنت۔ آئیءِ فرمان إنت " یک ذمواریں إنسانے بیگءِ سببا مئے سرا فرض إنت کہ ما بے بھائیں زندگیاں شہ زوال بیگا بہ رکـّینیں۔ ما ھمے سرپد بیتیں کہ گوں 'بھٹو' گيئشتر گرچیل بیگءِ معنا قومانءِ سرا فوجی رواج آرگ إنت۔ من 1973ءِ بن راھبندا داتگیں حقاں شہ فوجی رواجا گھتر لیکاں۔ إیشی شہ 1947ءَ پد پہ مردماں شرتریں بن راھبند إنت"۔

پدا ھمے 'بھٹو'ءَ وھدے کہ بلوچستانءِ مردمانءِ گچین کتگیں سرکار برکنار کت و بلوچ سروک ئی دستگیر کت أنت، گڈا ھمے درگتا میر بزنجو گشت "'بھٹو' سرکارا جمھوری رواج پادمال کتگ۔ إیشیءِ جوریں بَروَرد ملکءِ تھا آمریتا لوٹائینگ إنت"۔

و ھنچؤش بوت۔ بزنجوءِ خبر ٹک دراتگ۔ فوجی جرنل ضیاءُ الحقءَ 'بھٹو'ءِ سرکار شکیں کت۔ و پاکستانءِ چکـّا زوراکیں سرکارےءِ پنچگ تا 10 سالاں مین شـُت أنت۔ بھٹو ھم شہ بَینا برگ بوت۔

چدا رند میر بزنجوءَ پہ بلوچستانءِ آزادی و پاکستانیانءِ إنسانی حقانءِ پانکجنیا شہ ھر بلوچا گيئشتر قربانی دات۔ بزنجوءِ پیسری ھمراہ سردار عطاءُ اللہ لندنءَ شت؛ نشت۔ میر گلخان نصیر مجبور بیت کہ ضیاءُ الحقءِ داد و دھشتاں قبول بہ کنت و دردانگیں نواب خیربخش مریءَ وتی ٹپـّییں ٹکءِ گچینی جھدکار زرت أنت و أفغانستانءَ بے تواریا نشت۔ ألبت بزنجوءَ پہ تـَچَگا رستگیں سرجمیں موہ پہ بلوچ قومءِ خاطرا ڈالچار کت أنت۔ و ھمودا دشمنءِ چمانءِ کلاّ نشت؛ بلوچءِ پانک ئی جت۔

1973ءَ پاکستانی بن راھبندا دست نشان جنگ و پدا گوں بھٹوءِ سنگت و بھٹو سرکارءِ دئورا بلوچانءِ کشوکاں ھؤر نندگءِ گپ وھدے دیما کا أنت، گڈا مردم بانبر أنت۔ ھمے آسرگری کن أنت کہ میر بزنجو شہ بلوچستانءِ آزادیا شموشکار و پاکستانءِ داما کپان أت۔ إے باروا آئیءِ وتی گفتارےءَ بہ چار ات کہ 1980 دھرا ماں لاھور برجم داشتگیں 'إم آر ڈی - موومنٹ فار رسٹوریشن آف ڈموکراسی'ء ِدیوانےءَ پد آئیا گوں روچتاک جنگءِ حالکارا گشتگ أت "مارا حقیقت پسند بیگ لوٹیت، ھمے سبب إنت کہ من گوں وتی قومءِ زییں قاتل (ٹکاخان)ءَ ھؤر نشتگاں و مرچییں قاتل (ضیاءُ الحق)ءَ ولگوج کنگءِ راھے درگيجگا تـُکشگایاں"۔

ضیاءُ الحقءِ شکین بیگا رند وھدے کہ گچین کاری بیت أنت و بلوچستانءِ قومدوستاں ووٹاں بھر زرت۔ آوانءِ کشا میر بزنجوءِ گل 'پاکستان نشنلز پارٹی' ھؤر أت۔ ھمے درگتا یک حالکارےءَ میر بزنجو ٹوک دات و گشت کہ تو ماں قلاتءِ پارلمنٹا گوں پاکستانءِ ھؤر بیگءِ مزنتریں مخالف إتئے، مرچی پاکستانءِ ووٹاں بھر زریگائے؛ آخر قصّہ چے إنت؟

بزنجو درائینت "من أنگت بلوچستانءِ آزادیا لوٹوکاں۔ أنگت من شہ 'ھرمز' (تنک)ءَ بہ گر تا ڈیرہ إسماعیل خانءَ بلوچستان منـّاں و إے ھنداں نندوکیں بلوچ أنت۔ بس جھدءِ راھبند مٹـّتگ أنت"۔

بزنجو شہ وتی زندءِ أولسرا بہ گر تا گڈی روچاں أبید شہ بلوچستانءِ آزادیا دگہ ھچ نہ لوٹتگ۔ پہ ھمے لوٹءِ پیلو کنگا آئیا وتی عمرءِ سئے یک (1/3) بندیگجاھاں گوازینتگ و دگہ سئے یکـّے عملی جھدا ماں بلوچانءِ دیما و دشمنءِ چمّانءِ کلاّ بیتگ۔ دیما بیگءِ برکتا آئی بلوچانءِ اُمید و دشمنانءِ راہءِ شنگ بیتگ۔

11 آگست 1989ءَ وھدے بزنجوءِ بیرانیءِ حال تالان بیت، گڈا موبائل ٹلفن نیست أت کہ قوم 'إس إم إس' راھا سھیگ کنگ بہ بیت، إیمئل ھم نہ گواھتگ أت کہ 'بریکنگ نیوزے' تالان بہ بیت۔ ویبسائٹ ھم نیست أت کہ بیرانیءِ حال ئی شنگ بہ بیت۔ إیوکا دپ ئی حال إتنت۔ ھمے دپ ئی حالا یکـّیں روچا سرجمیں کراچی پُچ إت۔ بلوچستانءَ حال شت۔ ھر نیمگءِ بلوچ جھدکاراں أرس شلونچگ بنا کت کہ غوثی شت۔

دومی روچ أت۔ بلوچاں نوکی یک حالتاکے 'إنتخاب'ءِ ناما رستگ أت۔ إنتخاب حبءِ ناما شہ کراچیءَ شنگ بیگا أت۔ 12 آگست 1989 تاکءِ کرّ چپ چاگردا سیاہ إتنت۔ نیاما یکـّیں حال أت کہ بابائے بلوچستان میر غوث بخش بزنجوءَ بلوچ قوم یلہ دات۔

ألبت ھچ کس چؤش فکر مہ کنت کہ غوثیءَ وتی قوم بے کس رنبینت۔ إنـّا۔ آئیءِ گفتار کہ ماں 1988ءِ ووٹاں کپگا رند گشتگ إتنت، مردمانءِ دلا نقش أنت۔ آئیا گشتگ أت "ھمے زھگ کہ منی دیما سوبین بیتگ أنت و من کپتگاں؛ منی وتی رودینتگین أنت۔ إیشانءِ سوبین بیگ پہ منی قوما شرّیں مستاگے إنت۔ من دلجماں کہ قومءِ سر گار نہ بیت"۔

شہ بیرانیا 20 سال رند مرچی أگر میر بزنجو زندگ بہ بیتین أت و وتی پشتپد ئی بہ دیستین أنت کہ 11 آگست 1947ءَ آئیءِ سروکیا شہ إنگریزاں پچگپتگیں آزادیءِ یادا سرجمیں بلوچستان شادھی کنگا أنت؛ ھر گورا ڈھل، سرنا، چاپ و نازینک إنت، گڈا ألمـّا شہ گلا بال بیتگ أت۔ مردم گوں دلجمی گشت کنت کہ آئی پیسراں سریا دگاں درکپتگ أت و بلوچستانءِ ٹالیں بیرق ئی سلام داتگ أت۔

http://www.balochinews.com/2009/08/blog-post_4756.html?spref=fb