بلـــوچ نسل کـُـشیءَ بنـد کـنت

بلوچءِ زند و جاور گوں بلوچءِ جد و جهد په وتی راجی و انسانی حکاں همگرنچ بوتگ. مروچی بلوچءِ شیرجنین دُتگ و شیرمزارین پُسگ ماں هنچوشین راجی زانت و بیداری یے رستگ انت که وابش ماں بلوچ راج دژمینءِ واکانی چمّان حرام کتگ. مروچی بلوچءِ سولین پرزند ماں زوراکانی هوپ ناکین بندیجاهانی تها یا آیانی پاهو ءِ دار سرءَ وتی راجی حکاں جار جنئگ انت.

داں مروچی هزارانی هزار بلوچ‏ءِ سولین پرزند وتی جان په وتی راج وسردگارءَ ندر کت و هزارانی هزار دگه ماں زالم و حونواریں واکانی هوپ ناکیں بندیجاهان بندیگ و گوں وڑ وڑین ازاب و سزایان دیم په دیم انت. حونوار و رسترین واکاں هچ چوشین روچے نه انت که بلوچ ءِ سولین پرزندیءَ وتی پلیت و شومین مکسدانی هرجان مکن انت.

بلوچءِ راجی جیڑه سدانی سال انت که جاری و ساری انت. نه حونوار و رسترین واکاں توانتگ که گوں بندیگ کنئگ و نه گوں بلوچ ورنایانءِ شهید کنئگءَ اے جیڑه ءِ دیما بدارانت. شهید عبدالمالک هم یکی چه همے بلوچستانءِ سولین پرزندانت که په وتی کومءِ راجی حکانی گرگءَ وتی سر کربانی کت و ماں بلوچ راج دپتر ءَ ابدمان بوت. یک روچے رند چه عبدالمالک ءِ شهید کنئگءَ ایرانءِ حونوارین واکاں ماں وتی میڈیا جار جت که 10 بلوچ ورنا دگه چه بلوچستانءِ سولین پسگان ایرانءِ حونوارین رسترانی پیسله ءِ انتظارانت.

ما نروژءِ جاه منندین بلوچ هور گون مزنین مذمتان اے مزنین تاوان په بلوچ راج و خاص په شهیدءِ مهکین مات و شیرتبین براس ومردم تسلیت گوشین وچه جهانی و بین الاقوامی واکان لوٹین که په بلوچءِ ورنایانی رکینئک چه ایران و پاکستانءِ حونوارین واکان دستءَ وتی جهد ءَبنگیج به کن انت و وتی ذمه واریان به مارنت.

نروژءِ بلوچ کمیٹی