ماں کراچی بے میاریں بلوچانءِ خون أنگت ریچگ بیگا أنت

پاکستانی شھر کراچیءَ متحدہ قومی موومنٹ نامیں گلےءِ سلاحبندیں باسکانءِ حملہ بلوچ میتگانءِ سرا أنگت برجاہ أنت۔ پیسری 25 کسانءِ کشا دگہ 14 کشگ بیت أنت۔ إے حسابا مرتگیں مردم 39 کس بیت أنت۔ پولیس و فوجا بلوچ میتگ أنگر کتگ أنت و دَرزناں بلوچ ورنا دستگیر کتگ أنت۔ دستگیریں ورنا ماں بندیگجاھاں لٹ کٹانءِ دیمپان أنت۔

شہ دستگیر کتگیناں یک عرفان نامیں ورنایے پولیسءِ لٹاں کشتگ و پولیسا إیشیءِ جسد ماں 'گارڈن' نامیں ھندےءَ دئور إش داتگ۔ رندا حال إش تالان کتگ کہ آئیا 'نامعلومیں' مردماں کشتگ۔

متحدہ قومی موومنٹ کہ ساریا مھاجر قومی موومنٹءِ ناما زانگ بیتگ؛ شہ ھندوستان تتکگیں مسلمان مھاجر و آوانءِ اوبادگانءِ أڈکتگیں گلے إنت۔ بلوچی نیوزءِ پولکاریانءِ ردا إیشیا سلاح رسینوکیں دستاں بازیں نامداریں بلوچستانی سردار ھؤر أنت۔ ھمے بلوچستانیاں إیشانءِ بازیں باسک مشکلیں وھدان پناہ داتگ أنت و شہ پاکستانی واکاں رکـّینتگ أنت۔ بادے مرچی ھم باز نامداریں سردارزادگانءِ نندپادا گوں ھمے گلءِ سریں مردماں برجاہ أنت۔

ھنّییں بیڑاں کشگ بیتگيں گيئشتر بلوچ واکداریں پاکستانی گل –پی پی پیءِ باسک ظاهر کنگ بیگا أنت۔ ألبت متحدہ گون پی پی پی واکداریا شریک إنت۔ پاکستانءِ بنجاھی سروک پہ وتی واکداریءِ برجاہ دارگا بلوچانءِ ندر کنگا پدرد گندگ نه بیگا أنت، بلے گلءِ لھتے سریں ھندی باسکاں وتی زھر درشان کتگ أنت۔ إیشانءِ نیاما ذوالفقار مرزا نامیں سریں باسکےءَ متحدہء خلافا ترندیں گال کارمرز کتگ۔

روچتاک إنتخابءَ شنگ بیتگیں واجہ ذوالفقار مرزاءِ بیانےءَ داتگ کہ مھاجران شہ جیکب آباد راکٹ لانچر و دگہ سلاح آرگءِ جھد شون دات کہ کراچیءِ جاوراں مھاجر إیمن بیگا نہ إلّ أنت۔
شہ جیکب آباد سلاح آرگءِ حال بلوچی نیوزءَ ھم شنگ کتگ أت۔ و ھمے ردا دستگیریں ندیم بروھی نامیں مردمےءِ باروا پاکستانی روچتاک 'اُمت'ءَ سرجمیں پولکاری حالے داتگ أت۔

http://www.balochinews.com/