پارلیمانی سیاست راج ءِ ریپینگ اِنت، لاشاں ابئید دگہ ھچ وڑیں سوبمندی نہ رَستگ، کچکول علی ایڈوکیٹ

بام: بلوچ رھشون واجہ کچکول علی ایڈوکیٹ ءَ وتی ھالترانے تھا گشتگ کہ اختر مینگل ءُ ڈاکٹر مالک بلوچ راج ءَ پارلیمانی سیاست ءِ پد نبودیں ھیالانی تھا مان مہ گیشّیناں ، چیاکہ گوستگیں نیم کرن ءَ بلوچ ءَ پاکی پارلیمنٹ ءَ بھر زُرتگ ۔ سوبمندی ءَ ابئید بلکیں مارا وتی پیر ءُ ورناھانی لاش دز کپتگ اَنت۔ ھزاراں بلوچ زھگ ءُ زالبول، کماش ءُ ورناہ بیگواہ ءُ شھید کنگ بیتگ اَنت۔ بلوچ ءِ مال ءُ مڈیانی لُٹ ءُ پُل یکشلا برجاہ اِنت۔ دُنیا ءِ سیر ءُ ازگارتریں گُلزمین ءِ واھُند بلوچ مرچی بزگی ءُ دِرتہ پُچی ءِ گُڈی حدانی تھا زِند گوازینگ اِنت۔ آئی ءَ گُشتگ ڈاکٹر مالک ءُ اختر مینگل اے گپ ءَ وت جوانی ءَ سرپداں، چیاکہ آ وت بازیں وھداں ھمے اسمبلیانی تھا بیتگ اَنت۔ اے اسمبلی ابئید ءِ وتی ءُ دُنیا ءِ ریپینگ ءَ دگہ ھِچ وڑیں بِستاری نہ دار اَنت۔ اے گَپ ءِ شاھدی ءَ آ وت ھم دینت ءُ داتگ اش۔۔۔وھدی گوستگیں نیم کرن ءَ بلوچ ءَ اے اسمبلیانی بھر بیئگ ءَ ھچ وڑیں نپ نہ رستگ تہ دیم ءَ ھم رَست نہ کنت۔ ووٹ ءُ الیکشن ءَ بھر زورگ ءَ پنجاب دُنیا ءِ دیم ءَ ھمے نشون ءَ دنت کہ بلوچ پارلیمنٹ ءِ بھر اِنت۔آئی ءَ دگہ ھچ وڑیں جیڑہ نیست۔ بلوچ ورناھانی قربانیانی سوب ءَ بلوچ جیڑہ عالمی تکاں سر بوتگ، پہ لھتے نام گیپتیں دومروئی منصوبہانی ھاترا مارا سرکار ءِ بھر جوڑ بیئگ نہ لوٹیت۔ مارا دُنیا ءِ دیم ءَ اے گپ منارینگی اِنت کہ بلوچ آجوئی لوٹاں۔ پارلیمنٹ ءَ بھر زورگ شھیدانی ھون ءِ گُما غداری ئے۔ ایشاں راج کدی ھم معاف نہ کنت۔

http://bamhal.blogspot.se/2012/05/blog-post_28.html