'نہ فلسطین، نہ لبنان؛ سر قربان پہ إیران' دانک کوکـّار بوت أنت!

جمعتُ الوداعءَ ماں إیرانءِ کسان و مزن؛ سرجمیں شھراں بیتُ المقدسءِ روچءِ حسابا مردماں ظاھری دات۔ إے ظاھری شہ إیرانءِ إسلامی إنقلابا رند ھمک رمضان ماھا برجم دارگ بیگا أنت۔

إمبرییں رمضانءَ مردمانءِ حساب شہ پیسری سالاں سک باز گيئشتر بیتگ۔ پرچاکہ بازیں مردم پہ دگہ مقصدانءِ پیلو کنگا آتکگ أنت۔ إیشانءِ مقصد أحمدی نِژادءِ خلافا وتی ناوَشیاں ظاھر کنگ بیتگ۔

إے مردمانءِ راھشونی سرکار مخالف ملا و پیسری صدر محمد خاتمی‏ و ووٹاں أحمدی نژادءِ دیما کپتگیں دو اُمیدوار؛ محمد حسین موسوی و مھدی کرّوبیءَ کتگ۔

إیشاں ماں ظاھریاں وتی سبزیں رنگ پیئشداشتگ و سرکاری دانکانءِ چپ چین و روس مُردہ باد دانک کوکـّار کتگ أنت۔ ھؤریا ألقدس و فلسطینءِ پلانگریا زیرگءِ بدلا آوانءِ خلافا دانگ إش کوکـّار کتگ أنت۔ خاص ماں إصفھان إشکنگ بیتگ کہ مردماں چیھال کتگ 'نہ فلسطین، نہ لبنان؛ سر قربان پہ إیران!'

بی بی سی فارسیءَ شہ لھتے حالجاھاں خبر زرتگ کہ إیرانءِ پیسری صدر محمد خاتمیءِ سرا شخصی گــُد پوشتگیں سرکاری مردماں حملہ کتگ۔ ألبت آئیءِ پانک دیما اوشتاتگ أنت و رکـّینتگ إش۔ ھمے گِرچیلاّ خاتمیءِ ملائی سَرپوش کپتگ۔

موسوی و کرّوبیءِ مچّیانءِ سرا أرس ریچی گئس چگل دیگءِ خبر ھم إیرانءِ سرکاری و دگہ حالجاھاں تالان کتگ أنت۔

ظاھریانءِ بنگيجیا پیسرتر جمعہءِ نمازءِ درگتا ماں تھران أحمدی نژادءَ یک رندے پدا 'ھولاکاست'ءِ حلافا گپ جت۔ آئی گشت کہ ھولا کاست یک سازتگیں ھنچؤشیں دروغے إنت کہ مقصد ئی سماسسائی پڑا یھودیاں برز برگ و مخالفاں زیر کنگ إنت۔

أحمدی نژاد گشت کہ أگر تاریخءِ حسابا ألقدسءَ دستگرگءِ حق یھودیاں ھست إنت، گڈا أمریکا ھم اودءِ 'سھر رنگاں' دیگ بہ بیت و یورپی شہ اودا در بہ کپ أنت۔

سرکاری حالجاھاں شنگ بیتگیں دگہ خبرےءِ ردا ماں مغربی بلوچستانءَ ھم ألقدس روچءِ درگتا مردماں مزنیں حسابےءَ ظاھری داتگ۔ ماں زاھدان، واش، سراوان، إیرانشھر، نیکشھر و چاھبھار سرجم بیتگیں إے ظاھریانءِ تھا شیعہ و سنـّی کش ماں کش همراه بیتگ أنت۔ آواں مرگ بر آمریکا و مرگ بر إسرائیل دانک کوکـّار کتگ أنت۔

Source: www.balochinews.com