ماں بلوچستان 7 آگستءَ پاکستانی واکانءِ دستگیر کتگیں إحسان أرجمندیءِ باروا أنگت ھچ حال نیست إنت۔ تنے وھدی شہ ناروے سرکارءِ نیمگا ھم ھچ ڈولیں حالے شنگ نہ بیتگ۔ غیر سرکاری حال گشگا أنت که ناروےءِ مردماں شہ پاکستانی واکاں إحسانءِ باروا سرپدی لوٹتگ۔
شہ پاکستان رستگیں حالانءِ ردا ناروےءِ یک ٹلوژن ٹیمےءَ ماں کراچی لھتے شاھد جُست پرس کتگ أنت۔ ألبت ناروےءِ حالجاھاں ھم تنے وھدی خاصیں حالے شنگ نہ کتگ۔ إیوکیں خبر کہ 'ناروے پوسٹ'ءَ داتگ، آئی شہ پاکستانی حالجاھاں نقل کتگ و إحسان أرجمندی یک پاکستانی أصل ناروےءِ شھروندے ظاھر کنگ بیتگ۔
پاکستانی واکدارانءِ نیمگا إحسانءَ بُندرا پاکستانی مردمے پیئش دارگءِ مقصد آئیا لٹ کٹ کنگءِ راها گیشینگ إنت۔ پرچاکہ أگر پاکستان یک درامدےءَ بے میار بندیگ بہ کنت و یا لٹ کٹ بہ کنت، گڈا ھما مردمءِ ملکا حق ھست إنت کہ شہ پاکستانءَ میاں اُستمانی قانونانءِ ردا جواب بہ لوٹیت۔ ألبت أگر بندیگ بندرا پاکستانی مردمے بہ بیت، گڈا پاکستان آئیا وتی ملکءِ قانونءِ ردا سزا و جزا دات کنت۔
.
ضروری إنت که ناروے جاھمنندیں بلوچ جھد بہ کن أنت تاکہ إحسان أرجمندیءِ حال ماں اودءِ حالجاھاں شنگ بہ بیت و آئیا بندرا إیرانی بلوچے شون بہ دے أنت۔ ماں ناروےءِ حالجاھاں إے خبرءِ شنگ بیگءِ سببا اودءِ سیاستکارانءِ سرا زور کئیت و توار چست کنگا مجبور إبنت۔
Source: Source: www.balochinews.com
No comments:
Post a Comment