شھید أعظم نواب أکبر بگٹیءِ زرّیں گفتار۔

تا وھدے کہ عمل مہ بیت، ھورکیں ٹاکاں فایدہ نیست إنت؛ گوات إش بارت۔ ھورکیں ٹاک مردم و قوما ودار و دغا دیگ إنت، و آیوکیں نسلا مزئیں نقصانے دیگ إنت۔ چیاکہ ھر کس اُمیدوار إبیت کہ إدا یا اودا کارے بیت، بلے ھچّی نہ بیگءِ سببا نقصان و بدّ دلی ودی إبیت۔

پارییں سالا ما گشتگ أت کہ گوادر ماسٹر پلانءِ کار شروع بیگا إنت، ھمائیا بیگا نئیلیں۔ إے رنگا کنیں یا آ رنگا کنیں! شاید شما سھیگ نہ إت، شمارا گشگ لوٹاں کہ شہ ھما وھدا به گر داں مرچیا گوادرءِ کار باز دیما شتگ۔ بازیں کساں سرمایہ جتگ۔ بازیں ڈگار حکومتا گپت أنت۔ تنیگا ھما کہ بیدخل کنگی أنت، نہ کرتگ أنتش۔ دیمی پروگرام إنت کہ بہ کش أنتش و إیشانءِ ڈگارءِ سرا وتیاں آباد بہ کن أنت۔

'گوادر ماسٹر پلان' و مکرانءِ 'اُور آل ماسٹر پلان'؛ تجویز و نقشوانءِ تھا پہ مکرانءِ مردم، گوادرءِ مردم و بلوچستانءِ مردماں ھچ سیت نیست إنت۔ وتی چمانءِ أندرا، ما جوانیا گندگائیں کہ إے بلوچستانءِ تباھیءِ پروگرامے إنت!

گوادرءِ مسئلہ بہ بیت یا چاونیانءِ و گوں زور زمینا برگے و یا مئے حقانئے کہ شہ سری روچاں گار أنت۔ إے مسایلانءِ حلءِ طریقہ من پیسرا گــُشتگ، پدا گــُشاں کہ مزاحمتی تحریک إنت۔
مزاحمتی تحریکءِ مطلب إے نہ إنت کہ شما کسےءَ گوں جنگے کن إت۔ شہ وتی ھـَندا وتارا ڈھال کنئے؛ دارئے کہ ما سازشا نیلیں. قربانی دیئے۔ وتی مرگا تیار بیئے۔ ساہءِ دیگا تیار بیئے؛ ساہ وا تئے جندئے إنت!

ساحل و وسایل؛ ساحل یعنی شہ کراچیءِ بہ گر تاکہ اودا إیران سیما، و مئے وسایل -ھرچے کہ ڈگارءِ سربُرا یا ڈگارءِ چیرا مئے دولت ھست إنت؛ شہ پنجاہ سالا گيئش إنت که (دشمن) ھمیشاں ورگ و ھضم کنگا إنت۔ نیں بلوچ کمّے مزاحمتا کنگا أنت۔ دارگءِ جھدا کنگا أنت۔ حکومت سرپد بیتگ کہ إے کلــّیں گنجءِ چکـّا بغیر فوجی زورا وتی قبضوا برجاہ داشت نہ کنت ۔

سرجمیں بلوچستانءَ و خاصکر ھمودا کہ تیل، گيئس و معدنی دولتءِ ذخیرہ ھست أنت یا اُمیدے کہ ھست إنت، پولیس تھانہ و إف سیءِ پوسٹ ٹاھینگ بیگا أنت۔ تاکہ ھمودا بہ نند أنت و فوج مضبوط بہ بیت. گوں ھمیشیءِ زور و بیما کلــّیں مڈیاں بہ بارت۔ بغیر مزاحمتا إیشیءِ دیما ما داشت نہ کنیں و وتی پجّار و وسایلاں رکـینت نہ کنیں۔ پمیشا مارا مزاحمتی تحریکءِ ضرورت إنت۔

Source: www.balochinews.com