جھدکار ماں چاگردا ھستیں سرپدیاں جنزء توشگ بہ منّ انت؛ بی ان ام

کوئٹہ -16 ستمبر 09 (آنلائن بیان) شہ بی إن إمءِ بنجاھی حالرسان کارگسا شنگ بیتگیں 'پالیسی' بیانےءَ گشگ بوت کہ بلوچ قومی جنز ھچ سردارءِ دستا نہ إنت۔ إیشی شہ ٹکـّی و دمگی واکا در إنت، و علمی راھبنداں دیما رئوکیں سیاسی و اُستمانی گل إیشیا سروکی کنگا أنت. گوں ھما مردماں کہ پاکستانی واکدار مزاکراتءِ گپا کن أنت، ماں جنزا آوانءِ مقام یک کسےءَ شہ گيئشتر ھچ نہ إنت۔

ھنوگیں جاوراں بی إن إمءِ جھدکارانءِ ذمواری إنت کہ آزادیءِ جُنزا درواریں کِردے پیئشدارگا وتا ساڑی بہ کن أنت۔ بلوچ جھدکار وتی نیاما ھمسنتی ودی بہ کن ئنت و پہ مقصد پیئش کنزاں بہ بنت۔ ضروری إنت کہ بلوچ چاگردا ھستیں سرپدی جنزءِ توشگ جوڑ کنگ بہ بنت۔

شہ سرکارءِ نیمگا 'آئینی پکج'ءِ گپاں تالان کنگءِ مقصد دنیاءَ باور کنائینگ إنت کہ سرکارا پہ مزاکراتا بلوچ لوٹائینتگ أنت، بلے بے سوب آسر بیتگ أنت۔ تاکہ ھمے عُذرا بلوچستانءِ سرا زنڈیں فوجی بیڑے برگءِ راہ پاچ بہ بیت۔

شصت سالاں یلہ بہ دی إت، أگر پاکستانی سرکار گوَستگیں سئے سالاں شھید بیتگیں مردماں پدا بیاریت، گڈا مزاکراتءِ باروا مردم چاریت۔ أگر چؤش بیت نہ کنت، گڈا بلوچ چونکا وتی شھیدانءِ داتگیں قربانیاں ڈالچار کت کن أنت! شھیدانءِ داتگیں قربانیانءِ إیوکیں بُها بلوچستانءَ آزاد کن إنت۔

Source: www.balochinews.com