Long live free and united Balochistan

Long live free and united Balochistan

Search This Blog

Translate

ڈمِّـِن ءَ کشت ءُ کُشار بلوچ دژمنیں سپاه ءِ کارانت


هشت بے گناهیـں انسانءِ کشتارماں ڈمّـن ءَ بلوچستـان جکسینـت ءُ هرانسانے چه اے هال ءِ اشکنگءَ  سک پدرد بوت۰ گوستگیں دوشمبه ءِ روچ ءَ  ڈمِّـن ءِ آبادان ءَ هشت مردم ءِ لاش درگیجگ بوتنت۰ چه شش ماهگیں ننکے گپته تاں شهید عبدالغفور دامنی ءِ جِند یکجاه  ماں آیی ءِ وتی لوگ ءَ کشگ بوتگنت۰
   سئے شمبه ءِ پیشیـم ءَ پهـرهءِ پلیس جارپِرِّینت که آ یکشمبه ءِشپ ءِ بے وهد یا که دوشمبه ءِبامگواه کشگ بوتگنت۰ هما روچ ءَ پلیس شنگ کرت که اے وت ماں وتی جیڑه اے بوته ءُ قاتـلاں پجاه آرگ بوتگنتءُ پلیس آهانی رندانـت! رندترا پلیسءِ سرمسترحسین رحیمی ءَ گشت که سئے مردم ءِ سرا شک کننت بلئے چه قاتلان هچ وڑیں رَد ءُ نشان یا "مدرکے" ماں عبدالغفور ءِ لوگ ءَ دست نه کپتگ! په همے سَوَب آ دستگر کنگ نه بنت
مردم هیران ءُ هبکه انت ءُ جست کننت اے  چوشیں رستری کئی کاراَنت؟ اشاں پرچے شش ماهگ، دو سالگ، سئے سالگ، نه سالگ ءُ سیزده سالگیں تبلانی هوں ریهت انت۰ اے پرچے زالبول کشت انت ءُ بے گناهیں عبدالغفورءِ میار چے اَ ت؟  اے کشتار کئے کار اِنت ءُ پرچا چوشیں سنگدلی؟
شهید عبدالغفور دامنی ءَ گوں هچ کَس ءَ دژمنی نبوتگ۰آ  گریب ءُ مهنت کشیں پوریاگرے َاَت ءُهچ کسءِ دَین یا وامے آیی ءَ بِر نبوتگ۰ 
اے اپسوزی گپ ایت که په بلوچانی میڑینگ ءُ کُشائینگءَ باز رندا دژمن کامیاب بوتگ اَنت بلئے تاریخ گواه ندنت که بلوچ ماں بیرگیری ءَ زالبول، ننک ءُ تبل کشتگ انت۰ راجدپترءِهر دورےءَ  بچاریں  پدر بیت که بلوچ هچبراے وڑءَ ونده گِری نه کتگ
اے کشتار ءِ درور عراق ءُ سوریه ءِ تها بازاَنتءُ هچ  بلوچے ءَ چه عراق ءُ شام ءِ وڑیں انسان کشی ءَ نپ ءُ سیتے نرسیت۰  اے گپ ءَ بلوچ راج ءُ دگنیا زانت که بلوچستان هنوں رژیمءِ سپاه ءُ لشکرانی دست اِنت۰گیش چه دو لک ایرانی سپاهیگ ءُ پئوجی بلوچستان ءَ وتی رستری پنجگانی چیرا داشتگ۰

ایش که شهیدعبدالغفورءِ کش ءُ گورءِ همساهگاں تیراگواری ءِ توار نه اشکتگ پیش داریت که تپنگاں بے توار بوتگنت بزاں  توارگارکنوک ( سائلنسر  ) اِش بربوتگ ءُ اے کشتار گوں سِنگدلی ءُ دوارسوچیں برنامه اے ءَ بوته۰ 
بےشمارانت تپنگ ءُ سلاه که ماں گوستگیں سی سالاں ماں بلوچستان ءَ شنگ ءُ تالاں بوتگ انت، آ دولتی انت بزاں جاسوسی اداره ءُ سپاه ءَ بهر کرتگ انت۰ هر بلوچے که کشگ یا زدگ بوته آ رستریں سپاه ءُ تهرانءِ واکدارانی تیرانی آماچ بوتگنت۰

پّدرانت اے سلاه ءُ تپنگ  که عبدالغفور ءُ زینب ءُ شکور ءُآهانی  لوگ ءِ درستیں زهگ اش کشتنت هماینت که محمد، موسی دامنی، مَدَت هان، محمد عمر دامنی، شهدوست ءُ مهندس برنایون ءُ آییءِ همراه  اِش کشت انت۰ اے درآمدیں سپاه ءُ  خامنه ایءِ هونواریں مذهبی ٹولی ءِ تیرءُ تپنگ اَنت که مئی گوانزکی کودک ءُ ورنا ءُ کماش ءُ پیراں کشگاینت۰

بلوچانی مستریں میڑینوک(جنگ دیوک) ءُ بلوچستانءِ دوار سوچیں جنگی "آرشیتکت" خامنه ایءِ جهان سوچیں سپاه اِنت ۰ اطلاعاتی چُگل ءُ زابلی ٹولی هم ماں اے کُشت ءُ کُشارءُ انسان کشی ءَ شریک انت  ۰
اے گپ ءِ ته ءَ شکّے نیست که هما بے تواریں سلاهاں که بے گناهیں شهید عبدالغفوردامنی ءُ آیی ء لوگ مردم اِش ٹنگ ٹنگ کتنت ءُ کشتنت سپاهءِ تپنگ ءُ سلاه اَتنت۰بلوچاں هژار بیگی انت که خامنه ای مذهبی ٹولی ءُ درآمدیں سپاه ءُ لشکر لوٹنت بلوچستان ءَ چه عراق ءُ شام ءَ ویرانتر بکننت۰
آزات ءُ آبــاد بــات گنجیــــں بلوچستـــــان
پروشت ءُ پروش باتنت ایـران ءُ پاکستـان
http://baluchistan47.blogspot.se/2017/01/blog-post_12.html

No comments:

Post a Comment