مــَـــــؤت شـــــــــكار
{ شير مرديں« آزات رينكی » و شهيديں آئی ءِ بچّاں عبدالمالك رينكی ،
عبدالحميد رينكی ،نوك ورناييں شهيد عبدالغفور رينكی و جهدكاريں عبدالرؤف
رينكی ءِ يات و نام ءَ }
عبدالحميد رينكی ،نوك ورناييں شهيد عبدالغفور رينكی و جهدكاريں عبدالرؤف
رينكی ءِ يات و نام ءَ }
هوشام ءَ مهر ءِ تُـنّـيـگ ، زور انت جُهد ءِ راه
بَلنت نيم شپاں هم ، همنند بنت گوں ماه
مار انت زهير و درداں ،ترس اش نه انت چه چاه
دَؤرانی تَهر ءَ ماننت ، دپتر به بيت گواه
***
پـُلّ انت و هر بهار ءَ آتار كن انت جهان
جَمّر به بنت نود ءِ ، وهد ءَ گوں بنت شَلاں
اميت ءِ بنت چراگے ، سمينے كلكشان
چَمّگ به بنت په نازے ، زهان ءَ چه زهاں
***
اِستال ءِ شاهدی ءَ ، اميت بنت وَديگ
بيهار و بيم و مؤت اش ، نے داشت كنت پديگ
مَلّنت و وهد و دَؤر ءَ ، زور انت رنگ پديگ
زندگ كننت دلاں ماں ، اوشت سال و هم سديگ
***
اميت ءِ بَر به زان ئے جهد انت و سوب ءِ راه
جهدانی بَر بزان ئے ، سوب انت كن ئے كماه
رُژن انت و آسرات انت آباتی انت براه
جُهدانی راه ءَ جهدكار ، رَهَز چه بے بلاه
( 2 )
راجانی دَپتراں ماں ، هم چِست و كـَپـت انت باز
هر دؤر ءَ ديستگ انت هم ، تَهرانی رنگ و راز
مَلّنت راج ءِ پُسّگ ، جَنگول و وهدے ناز
زندگ به بيت چو راجے ، پيكه به بيت داز
***
راج ءَ بلوچ ءِ گواه انت ، دنيای ءِ دپتراں
بيتگ مدام آبات ، مئے هَند و كهچراں
آزات بيتگ آجو ، پَهر ءَ په دنت سراں
زانتكار به بيت و يكدست،لوٹيت وتی دراں
***
آزات چو بلوچ ات ، آبات ماں جهان
لوٹ اِت وتی هساب ءَ ،چه زوراك و واجهاں
حقاں وتی په جنگ بيت گوں شاه و شه تباں
بيت ئی وتی نشانے ، بيت ئی وتی گِدان
***
ملك ءِ په سيمسراں هم ،همراه و شَؤر بيت
پَد مانگ ئی اَلس كت، همراه گوں دَؤر بيت
آزات و سرمتاب ات، دُژمن په جـَؤر بيت
مُلك واجه و سر اَت وت ، وژنام ءِ كـَؤر بيت
***
انگريز كه زانتكار ات، هتيار و هم په جنگ
پروشت ئی چو باز راجاں،ٹپ ئی كت انت پلنگ
چير جَت وا بازيں راجے ، آتكگ بلوچ ءِ دَنگ
كُشت ئی بلوچ ءِ شاه ءَ ،« مهراب »شه نهنگ
***
ايلگار انگريز ءِ ، كرتگ بلوچ تباه
بازانی چاتاں بند كت ،بازانی گپت ساه
بازانی كت درانڈيه ، بازانی كت بيگواه
بازانی سار ئی گپت انت ، چيزے گُلام مڑاه
***
گَشتگ بلوچ ءِ دؤر و گَشتگ بلوچ ءِ روچ
داتگ بلوچ جنگاں گوں هَلمه و گروچ
سُتك اِش پد انگريز ءِ ، انگريز هم بے موچ
بهر ئی كُت انت مُلك ءَ،لوگ ءَ و جاه و كوچ
***
وَنڈئی كت انت بلوچاں سئے جاه و سئے بهر
سئے مُلكءَدَين ئی دات انت،حقی كتنت زبهر
ايران و پاكستان ءَ ،كُرت ئی بلوچ ءِ سر
اوگان ءِ بادشاه ءَ ، چُنڑے وا دات هنر
***
هَتيار و پئؤج باز ات اِے ملك ءِ بادشاه
سرچوپ كت اش بلوچاں،گينگر بيت ساه
بست اِش و چُپت و كُشت اش، بے جُست و بے گناه
راج ءَ بلوچ ءِ پَشت كپت نے پهر و نئيكه ٹاه
***
چيزے كه جه جتگ هم راج ءِ په عزت ءَ
بيگواه و گار و سرچوپ ، بيت انت اناگت ءَ
حقے نه ات بلوچ ءِ ، نے مُلك و دَؤلت ءَ
بيگواه ات مُلك ءِ واجه ،لـَنڈر وا شدّت ءَ
***
نے بيت زبان بلوچ ءِ ، نے دود و نے رواج
بُرتگ بد اچ بدوّاں ، لَكے دوسر وا باج
كَپت جَهل عزت و شان ، هاكاں هوار تاج
پرشتگ يلانی ديوان ، بور ات لـَوَنگيں راج
***
چيزے وا لـَڈ اِت انت هم داں مَند و زنگبار ءَ
بلوچ ءِ شاهی بيران ،موتكاں و بَژن ءِ جار ءَ
دَپ چَٹ چُنت كس هم ، بد ءَ گوں همتوار ءَ
بينگانی داب په زَنبے ، هَڈ چونڈی ءَ هوار ءَ
( 3 )
دَؤر انت كه تَرّ ايت دائم ، راجانی زور و واك ءَ
كـَد جيل و بند و سركـُٹ،دار انت راج ءِ جاك ءَ
دپتر وا جهد ءِ نام انت ، جُهداں گوں لِيٹيت تاك ءَ
زُلم ءِ نه مانيت دَؤر هم ، گر كه به بيت شيپاك ءَ
***
زوراكيانی سيه شپ لـَوَنگ شپ چراگ چو
بَلنت و رُژن شاننت ، زانت ءِ بَل و سما گو
استار بنت دلاں ماں ، اميت و بيوس ءِ شو
ژولّيں سيه شپ ءِ زُلم،كـُٹيت ٹـِكّ بدنت رو
***
جنگول چيزے چست بيت حقاں وتی په لوٹ
آس دات زند و جان ءَ ،زُلم ءِ به سوچ انت كوٹ
نام اِش تاں ابد بيت ، راج ءِ دل ءَ ماں نوٹ
آزاتی ءِ ره ءَ چه ،هچ وهد نه بيت انت چوٹ
***
ايران ءِ مُلك ءَ آتك چو روباه و ملا زاتاں
هٹلر چه كشت و هون اش،سر كرتگنت ياتاں
نے كـُرد و نے بلوچ اش ، نے تركمنيں براتاں
نے پارس و نے عرب اش پَجّ ءَ نكت كمزاتاں
***
بلوچ ءِ ڈيه هولّ بوت جادوگرانی دست
كس تَتك و جِست و چير بوت،كس مَنجلاں گرست
دپار بوت بند و دار ءِ ،كس سيمسراں چه رَست
كس جهجتگ په راج ءَ ،سر و سرين اِش بست
***
ايران ءَ آتكگ انت چو جادو و ملا زاتاں
كـُرتش هما كه منگول،گواه هم نداته ياتاں
هولّ بوت په جن و چوپ،پجّے نبوت په ماتاں
ليبے وا دست ءِ گـُڈگ،هون ءَ وا پُرّ چاتاں
***
« آزات » زرت رُمبے بچّاں چه سرمچار
زُلم ءِ بد ءَ په آسے ،راج ءَ په مهر وار
هم رينكيانی زات و هم راج ءِ پهره دار
هم تولگانی جان ءَ ، شير بيم و سك مزار
***
دركپتگ انت پڑ ءَ ماں۔ هم جنگ ءَ په نشان
كوه و گران اش كت جاه كينگءَ چه جُشاں
تَهليں بد اِش جتگ باز،باز اِش كتگ كُشاں
ترس و چه بيم لرز ات،دُژمن وا بيت هُشاں
***
هور و هوار ات ورنا ، يليں سرمچار
شه بكش و نارويی هم، قنبرزيی كتگ توار
دهمرده و گمشادزيی...بارانزيی هوار
يك بيت بلوچ ءِ راج و يك بيتگ انت مزار
***
شير بيميں نرمزاراں عبدالمالك ات سر ات
براتاں و راجی ديوان ، اِستارے پــدّر ات
بستگ سُرين شپ ءِ ديم ،كاٹار و هنجر ات
سئيں براتی همراه،بيت انت چو ره گَر اَت
***
عبدالحميد ات مَستر ،هم جنگ ءَ بيت روان
بازيں بيلی زرتگ، ماں جنگ و جيڑواں
دُژمن ءِ دلی كباب كت گوں جنگ و هملواں
بنديگ ماں پاكستان بيت،بُرت اِش ماں كوڑواں
***
سر داشت بُرز و گوئشت ئی:زُلم بيته مئی سرا
جاتوگيں ديه و ملاّ ، سُچاں چو انگر ءَ
برداشت كناں بد ءَ نه ،ٹـِكّ گوئشت آ نر ءَ
پاهو ءِ دار ئی چُكّ اِت،هم راج ءِ هاترا
***
عبدالغفور برتگ موٹلے گوں شوروان
گينگر په «پاسداراں»،اهانی سُتكه جان
وت هم زراب ءَ بمب ءِ، رپتگ چه اے جهان
ميركمبری مزار چو ،وَژنام نوجوان
***
عبدالرؤف ات چارمی ، براتانی بيت توار
شهمرديں سرمچارے،حق لوٹ و بُرزجار :
ننگ انت كه زُلم ءَ مَنّ اوں،راج اوں به بيت وار
آزاتی ءَ وتی په ،ندر انت ساه و سار
( 4 )
« آزات » جهجتگ چه ، دُزّآپ ءِ گنجيں شهر ءَ
بلوچ ءِ هَنداں هرجاه رپتگ وا بـــاز بــــار ءَ
بَچّ ئی به بيت انت نامدار،جهداں و گوں هنر ءَ
وت بالت انت گوں آس ءَ ،روك اِش كتگ گوں سر ءَ
***
نام اِش چه مُلك درشت،هركوه و هر گَرے
اِستون ءَ چو توار كت،گرئندانی كُهكرے
مُلك ءَ بلوچ ءِ درگوئست،دنيایءَ بيت سرے
پَهرے بلوچ ءِ دل بيت،دُژمن په هنجرے
***
مانيت جهان ءَ نامی،ميركمبرانی گوں
دنت انت بلوچ ءِ ورنا،نوروزءِ داب شون
اكبر به بيت به مُلّيت،زردكوهی نَدر هون
بيرك كت اِش بلوچ په،وتی ساه و جون
***
هَے هَے شهيديں سالونك مَلّ ئے دلاں به مَلّ
سر جَهل انت تئی سلاماں،ساراُں دمے به جَلّ
لَؤزاں به ياينت رد بنت ، بَر شان به بنت وَلّ
بيلانی شپ چراگ هم ، بـُـرّانی بُـرّ و گـَـلّ
***
كاينت سَكّی ءِ روچ ،كاينت جهدكار
اے راه ءَ دركپ انت هم،راجانی لك سوار
بيم ءَ دَينت بيهار ، مَـؤت ءَ كن انت شكار
مانيت نام اِش دائم ،ماں دپتراں مزار
***
«مالك»به بيت الّم، چه كم دروريں سراں
«يعقوب مهرنهاد»چو ،راج ءِ چه مهروراں
« حميد » چو برشكنت ، آسے دليں پُراں
« غفور » نوهليں هم، مهر ءِ چه دَروراں
***
ساه اِش بداتيں زند چو،ساه اش بداتيں راج
راج ءَ په پهرے بيت انت،هاك اِش نداته باج
ورناييں كنگراں په،بيت انت اميری تاج
دودانی بيت انت دَروَر،داشت اِش وتی رَواج
*
شيرانی شيرشكاری و هَپتار ءِ مور گِرَگ
ماننت زمانگاں ماں ،جنگاں بنت سِرَگ
آبات بنت راجاں ،دروگاں بنت دِرَگ
گار كد نه بنت جهدكار،هچ وهد په مِرَگ
*
شاباش زُلم شكار و شاباش همبلاں
دائم به بات اِت مئے يات،دائم به بئت گَلاں
راجانی تاج بات اِت،سوبانی هم نشان
زُلمانی وَلگوَجوك اِت ، آباتيں ملپداں
( 5 )
لَـكّيں سلام بات انت «آزات »ءَ همبليں
پُشترند و راجی زهگ ئی،سرگوئسته شَر تَبيں
بَستگ سُرين و همّت شيرانی سانكليں
ساه ءَ چه گوئستگ انت سر، سالونك همدليں
*
لكّيں سلام بات انت، شيريں شيرزالاں
مهر ءِ كه داتگ انت شير،نوكزات و نوك نهالاں
رودينتگ اش په راج ءَ،شيربيم و شير هالاں
كـَٹ اِش كتگ په مردی،هم نام و هم كمالاں
*
لَكّيں سلام بات انت،سربُرز هم هما مات
عبدالمالك ئی كه گوئر دات،راجی كتگ په سوگات
ناترس و سرمچاری رودينتگ انت شر زات
دل ئی به بات كوهے،راجانی دپتراں يات
*
شاباش لكّ هما دل،بند انت سُرين په راج ءَ
زند ءَ چه سرگوئز انت وت،راجءِ په بيه و باج ءَ
دار انت پَهر و دوداں ، مردی په بنت تاج ءَ
گُٹ گِر كن انت بدواه،زُلم ءِ نه مَنّ انت واجه
*
پئؤجانی ديما دارگ، لَكّاں و هم هزار
كار انت بلوچ ءِ ماتاں، پهراں په نامدار
بيرك بدار انت راج ءِ ، بلوچ ءِ مَلگزار
چَنڈ ايت و بيت گواتو ،تاں زندگ انت مزار
كريم بلوچ _ تَـهـل
2010 ءِ جون ءِ گـُڈی روچاں
No comments:
Post a Comment