* بے راھبندی بیگواھی یے *

Qazi Rehan

19 tim · Har redigerats · 

* بے راھبندی بیگواھی یے *

‫#‏بلوچی‬ زبان ءِ گیشتریں نامی ئیں لچہ کار ، نوشتہ کار زبان دوستی ءِ گپ ءَ جنت ، پہ زبان ءُ ادب ءَ پیشوک اَنت ، آھانی گیگان کنگ بیت بلئے اگاں آھانی نوشتانکانی سر ءَ نگدانک بہ بیت گڑا آھانی کر ءَ سھرائیں نزوری گندگ بنت ۔

باید ھمیش اِنت لچہ کار '' تُک بندی '' ، '' آزاد لچہ '' یا '' رم لچہ '' ءِ نام ءِ سر ءَ '' ردانک نویسی '' ءِ سر ءَ ازمی چمشانک بہ دئے اَنت ءُ نوک باھند کہ آھانی گیگان کنگ ءَ اَنت ، آھاں شونکاری بہ کن اَنت ۔

ردانک نویس بلوچی زبان ءِ بنرھبند ءِ نیمگ ءَ دلگوش بہ دئے اَنت ، برجم ءُ سرجمیں کارے کہ سیدھاشمی ءِ گندگ بیت داں ھمینکس کہ پہ آھاں مناک اِنت ، بہ زیر اَنت ئِے بلئے وتی نوشتانکاں انچ بہ نویس اَنت کہ بلوچی زبان نوشتاری زبانے سما بہ دنت ، نا میتگ ءُ کلگی ۔

ھرچ زبان ءِ دو بھر بنت ، گْوشتنی ءُ نوشتاری ۔

زبان دوست! تو کہ پہ وتی زبان ءَ نوشتاری تک ءَ دیمروی ءِ لوٹ کنگ ءَ ئے ، الم بیت تو ھم سنگین بہ بَہ ئے ، کمے وتی تہ ءِ اے مزنی ءَ ھلاس بہ کن کہ ھرچی من دربُرتگ ھمیش اَنت ءُ بس ۔ بوت کنت سیدھاشمی ءِ '' سیاھگ ءِ راست نویس '' ءُ '' سید نمدی '' ءِ گشتے وانگ ءَ ترا سما بہ بیت کہ تو وتی سیاھگ ءَ گھتر ءُ واناک کُرت کن ئے ، گالاں کہ پہ دربرگ چار ئے بوت کنت ترا گالردانی رِد ءُ بندے چَہ وتی رد ءُ بنداں دوست تر بہ بیت ۔

بلوچی زبان ءَ بنرھبندے ھست، آ بنرھبند زیرگی اِنت ، منگی اِنت بے راھبندی یے بیگواھی یے ۔

بہ یا وتی ھبراں شمارا پہ گواچنی گْوشگ ءَ اُستاد منیرمومن ءِ دستونکے شمئے دیم ءَ ایر کن آں ۔

تو کہ در کَہ ئے سنچ گش ئے چار کنڈ ءَ بُج اِیت
رژن روت ماہ ءِ وشبو ءَ پلانی پُل اِیت

تئی ودارانی رھسراں ماھے شھم کنت
گوات گلیں سھب ءِ کُل ءِ تئی پادون ءَ گْوز اِیت

سر بہ گر مھلہ دراج اِنت سک مِھرانی سفر
دیم ءِ تئی دنزاں روچ وتی دزمال ءَ مُش اِیت

تو بِہ بَہ ئے کہ بلکیں بُست کنت اھد ءِ دل زدگ
گریشگ ءُ ڈناں ٹیٹلیں آھویے ھز اِیت

واھگ ءُ مِھر ءِ پُرشتگیں عکس اَنت پدر اَنت
شیشگیں وابے دیدگ ءِ امبازاں پُرش اِیت

کسے پُلاں تئی آھگ ءِ مستاگے بہ گیپت
مھلبے شنز اِیت رنگ ماں چنکاں بھر بیت

من ھما روچ ءَ ھم ‫#‏منیر‬ درگیج آں وت ءَ
آ وتی شوھاز ءَ چرے بازار ءَ گْوز اِیت

پاس جنان اِنت دروازگ ' منیر ‫#‏مومن‬ تاکدیم ۳۵

کسے کہ لچہ کاری ءِ درگت ءَ کمے باز سرپدی دار اِیت ، زانت کہ دستونک ءِ کلاسیک سھڑا ءِ تہ ءَ ، دستونک ھما لچہ کاری اِنت کہ آئی ءِ تہ ءَ تلمل بند ءِ جتکاں ھمک بند گوں پیشرد گْوشگ بنت ءُ چَہ آئی ءَ پد ھمک جتک ءِ بنداتی بند بے پیشرد بیت ءُ دومی گوں تلمل بند ءِ پیشرد ءَ ھم پیشرد کنگ بیت ۔

گندگ ءَ اُستاد منیر ءَ ھم انچوش کُرتگ ، بلئے بہ یا '' پیشردکاری '' ءِ ھما ستا کہ کتابانی تہ ءَ ھست آئی ءِ ھساب ءَ اد ءَ کارمرد بوتگیں ، پیشرد { قافیہ ] گوں یک دومی ءَ پیشرد نہ ینت ءُ اے مزنیں ازمی نزوری یے ، ءُ سما ھم دنت اُستاد ءَ انچوش کہ اے ھوار نوشتہ کُرتگ اَنت وتی من ءَ پیشرد گندگ بنت '' بجیت ، پلیت ءُ دگہ '' [ برز ءَ دستونک من انچیں سیاھگے ءَ نوشتگ کہ بہ گیش اِیت ] ۔