- هر شاعری زبانه باروا دو گپ هست

Karim Bashandeh Baloch

3 tim · 

من هما روچه روشنین برانزان
چه منی ایر گواتا هزیت تهاری

4- هر شاعری زبانه باروا دو گپ هست , یکی ای که ائیا چی گوشتگ و تان چی حدا اجتماع تها همدلی پیداگ کتگ و دومی آئی شعر گوشگه رهبند انت که لبزانی گالریچ و شعری دروشم چه رنگا انت و اهانی بیانه کیل و کیاس چه حد ا سنگین و وزن دارانت ؟ من گون وتی زانته نزورین میما بلکین ای گیگا نیان که جی آر ملای ورین شاعری باروا دلجمین گپ بجنان بله ای حبرا په ستک گوشت کنان که بلوچی شاعری تها جی آر ملای زبان په سادگی و شیواری پهلگار ترین زبان انت که آئی ء دامن چه هر ورین وساچیا بی میار انت . عام شعر وانوکانی گورا جی آر دلپسندی همی پلگارین و سادگین زبان و تازگین تصویر انی برکت انت . راجه ظاهر و باطنه درد و مارشت هنچوش په وش تبی و براهداری وتی شاعری ء تها کماتگ انتی که مهلوکه ذهن و زبان جور بیتگ انت . په درور :
هیالانی تلار دیما ن /
ای دل چو پاچنا درنگ انت /
یا :
شپ گوستگ بزان روچ انت
نی مرگان توار زرتگ/
نی موران ندگ گون انت/
نی گوانزگی تپلان هم /
گری په گلگ گون /
یلدی نی گرو ژیمبان /
کوهان که رجگ زرتگ/
و دومی گپ ایش انت که جی آر ملای اصلی بن گپ گیشتر راجی درد وعذاب انت و هما زبهری انت که قومی حق اش گشنت . ای میدانا جی ار گوشتگین نظم په نامداری و
قومه واهگدارانی نزا اهانی پذیراهی نه که چه کسا پدا تر نه انت بلکین گوشت کنین چه هرکسا دیما تر هم هست انت مئی شاعرانی تها مبارک قاضی گوشندهانی شعران سر په در دگه کسا جی آر حدا عام مهلوکه دلا جاگه نه کتگ. جی آر نظمانی دل آشوبین توار انگت تیوگین هشتاد و نود ء دهگه مردمانی ذهن و زبانا یک ابد مانین نقشی ایر کتگ . که ای نظمانی توار جکسگا سالانی سالا پد بی هال کت کنت :
میرین بلوچ میرین بلوچ
پر تو سلامی گون کنان
دستا دگه هچون نه بیت
من چون کنان من چون کنان
یا :
گوش دارت منی براتان
نو گلگین کسان زاتان
که گژن و بدین واری
دل ریش ودل آزاری
بی کاری و چمداری
پرچیا په بلوچان ان
یا دگه نظمی :
همبل منی همبل منی
پرچی به نندی ایمنی
یا :
وهدی که گژنه کاروان
چو بیرگا دل تنگ بیت
و دگه بازین نظم و مثال که یک آشوبی دوره کویاکین توار بیتگ و جی آر ملا مردمانی دوستناک و نترسین شاعر بیتگ.
.....ادامه دیمترا کیت !
کریم باشنده