دومـاه پيســـرا پنچ نوک ورنائيـں زانت دربـر ( شاگـرد ) ءِ سوچـگ ءِ درد يگيـــن ءُ جگـرسندوکيـں هــال بلوچ گلزميــن ءَ جسکينــت ءُ اوپارکشيـــں بلوچانـی ٹپـّـان ءُ دلــی دردان ءَ گيشتــرکـُــت. چهبــارءِ دريايی زانت ءِ وانگجـاه ءَ پنــج نوک ورنائيــں واننـده شيرکنيــں واب ءِ تها زندکا سهـت انت ءُ پيلشـت انـت. دو نپـر چــرے معصوميـــں زانت دربـراں کمبـر غريـب ءُ قاسم حيرتـی هما جاه ءَ بزاں زالمانـی روک کتگيـــں آس ءِ ته ءَ ستــک ءُ شهـيــد بوتنــت. سئـے سوتکگيــن ءُ پيلوشتگيــں بلــوچ نوک ورنـا چـه آس ءِ شماله يـاں زندکـا در کنـگ بوتنـت. بلئـے ماں چهبــارءَ الکاپيــــں درمانجاهـے وَ نيسـت اَت تنکـه بلــوچ ورناياں اوداں دوا ءُ درمــان به بنت. ٹپـی ءُ سوتکگيــں ورنا گـوں وتی سيـاد ءُ لـوگ مردمانی کوشسـتاں چه چهبـارءَ ديـم په دزآپ ( ايرآپ ) برگ بوتنـت ءُ رنـدا تهــران ءِ نادراهجاهـے ءَ په دوا ءُ درمان کنـگ ءَ برگ بوتنـت. اگاں چـه اے ورناياں چه زالمانـی روک کتگيـںآس ءَ رکينـگ بوتنـت بلئـے سوچـک ءِ ٹپّانـی مزنـی ءُ په وهــدا دوا ءُ درمان نه بيـگ ءِ سبـب ءَ دو نوک ورنا بـزاں فرشيـــد درزاده ءُ برهــان الدين بليده ای مـاں تهــران ءَ شهيــد بوتنــت. بلــوچ راج يکرنــدے پــدا چه فاشيســـم ءِ دوار سوچيـــں آسءَ سوگيـــگ بــوت.
ايرانــی زرپرستيــں واکـداراں که تهنــا وتی نـپ ءُ سيــت ءِ پگــر ءُ هيال ءَ انـت چـه بلوچانی سوچگ ءَ هـچ پـرواه اِش نيسـت ءُ آهانی گـوشـاں ءَ مـورے هـم نه وارت.
وهــدے کـه گـوں زاری ءُ پريات په ستکگيـــں بلـوچ ورنايانــی بـَرَگ ءَ ديـم پـه ايـرآپ ( دزآپ ) چه تهـران ءِ واکــداراں يـک بالـی آمبولانســے ( آمبولانس هوايــی ) لوٹــگ بـوت گـڑا پـه تـهــروز ءَ جــواب اِش دات : « به مــا چـه مربوطــه!» تـن تـن ايرانی «هــلال احمــر» هـم وتا را پيـش داشت ءُ په بلـوچ ورنايانـی رکينـگ وتـا را نه سرينــت! رنـد چـه پنـچ پـُردرديـں ساهــتانـی ودار بلـوچ نـوک ورنايانـی ستکگيــں جاناں هـپت ســد ءُ پنجــاه (۷۵۰) کيلومتــر گـوں يک هرابيـں آمبولانســے ايرآپ (دزآپ) ءَ برگ بوتنـت.
آوارجتگيــں بلوچستـــان ءِ مــال ءُ مـــڈی ءُ هاســکار چهبـــارءِ آمدنـــی، بلوچستــان ءِ زر ءِ پـل ءُ پانــچ بيوکيـں نيامــت سالـے ميليونان ڈالر ( دلار) انت ءُ اے پدريـں گــپ ءَ تاں انــدازه اے وَت هـم مــنّ انــت ءُ همــک ســال ءَ جار جننــت که آهــان چه چهبار ءُ بلوچستـــــانءِ زِرءَ چنکه ڈالر ( دلار) رسيـت.
اے زالميـــں زَرپرستــاں که بلــوچ راج ءِ کينگــی دژمـــن انــت يک الکاپيــں درمانجاهـے گـوں استاندارديـــں ازباب ءُ وسيلـه مه چهبـــارءَ اڈ نه کتـگ تنکه بلــوچ اوداں دوا درمان به بنـت ءُ يـک بالـی آمبولانسـے په ٹپـی يـں بلــوچ ورنايانی رکينـگ ءَ هـم ماں چهبــارءُ سجئيــں تياب ءَ نيسـت اَت ! بلوچستــــان ءِ بندنــان ءُ لنجيـں زر ءِ پل ءُ پانچ بيوکيـں آمدنــی که باز گيشتــر چه هکومتـی زرپرستانی هســاب کتـاب انـت شـپ ءُ روچ بلــوچ دژمنيـں واکـدارانی کيسگ ءُ بانکــی شمــاره هسابــان رُمبـــان انت ءُ ايردستيــں بلــوچ چـه گُلُمبـے ورگـی آپ، دوا درمان ءُ نادراهجـــاه زبهــر، مهتــاج ءُ چمــدار دارگ بوتگنــت.
همے بلـــوچ دژمنيـں هکـومــت چنت ميليون دلار حزب ... لبنان ءَ همک ماه دنت؟ چنکه دلار شـــام ءِ زورانسر ءُ هونواريـں بشار اسد ءَ دنت؟ چنکه دلار همک سال اوگانستان ءِ هزاره يان ءُ عراقی جيش مهدی ءَ دنـت؟ چنکه ميليارد دلار اِش ماں يوروپــی ءُ آسيايــی بــورس ءُ بانـکان، وتی ءُ وتی تـِــرّن ءُ نازگليــں چکانی نام ءَ ايــر کرتگ؟ بوليـوی، ونزوئلا ءُ آرام مزن هـور ( اقيانوس آرام ) سئـے جزيره ياں چــنت سـد ميليـون دلار ريچگايـنـت تنکه چنت واريـں مــردم ءَ شيهــه بکنائيــن انــت؟
ترکيـه، روس، چيـــن ءُ اروپايـی مـکاریں دلّاراں سالـے چنـت سد ميليون دلار جــول ءُ رشـوت ديگاينــت؟
زانان پـه چهبــار ءَ يک بالــی آمبولانـس (هوايی آمبولانس) ءِ راه ديــگ ءِ بهــا چنکــرانــت؟
پـه جـوانــی ءَ پـــدر انـت که ايرانــی رستريـں واکــدار بلوچانــی وهديگيــں هونــی دژمــن انت. پميشکا نئے تياب ءِ مردمانی ورگی آپ ءِ گم اِش هست ءُ نئيکه دوا درمان ءُ بلوچانی گهبودی ءِ پگر انــت.
اگاں همـے واکدارانـی چکـےءَ کلـگ ( جـَکگ) ءُ پشـّانکـے ( لمپوشک) به گيپت گـڑا آيی ءَ تهران ءِ گـِهتریں نادراهجاهــاں برت کننــت. آ که باز نازگـَـل انــت په انچنائيــں نادراهيانـی ا لاج کنــگ ءَ لنــدن، پاريس ءُ فرانکفـورت ءَ بال ديگ بنـت! بلئـے بلوچ ءِ نوک بروتيـں ورناياں زندکا سوچنت ءُ رندا گـوں بـے دردی ءَ نندانـت ءُ چارنــت. يا کـه اوشتنت ءُ وتی بگـلاں گـوات دينــت ءُ چه مئـے ورنايانی زوال بيگ ءَ بچکندانـــت! البـت وتــی دراهـیں واک، رسانککاری ءُ هالرساناں کارمرز کننت تانکه هاله ئيـں مجرمانی نيمــگ ءَ هچ کـس دلگــوش گـور مه کنـت ءُ گــوں پاتـرپ، پلينــڈی ءُ زبردستــی اے پـدريـں جــرم ءَ چيــر ديگ لوٹنــت.
اے چيريــں گپـے نهنــت که ايرانــی واکدارانـی سياسـت ءُ انسان دژمنــی کارکــرداں ماں بلــوچ گلزميــن ءَ گوستگيــں هشتــاد سـالاں چـے بوتـگ انــت. آهانی انسان دژمنيــں کينگــی کار دگنيــاءِ هچ ملکـے ءَ گــوں ايردستيــں راجاں نه بيــت. بلـوج ءِ هــزاراں چـک، نـوک ورنــا، ورنـا ، کمـاش ءُ پيريــں مــردم اشانی رستری سياسـت ءُ کارکردانـی آماچ بوتگنــت. بلوچستــان ءِ شهيدانـی کاروان هنچــو دراج انت که چـه شمــار ءُ هساب ءَ درانـت. بلــوچ ورنايانی تير جنــگ، درنجــگ، زندکا سوچــگ ءُ شهيــد کنـگ ءِ دليل ايشنــت کـه آ بلـــوچ راج ءِ اوبادگان انــت. بلـوچ راج وتـی شاهگـــان ءُ بـے درويـــنءُ پر نيامتيــــں وتـــن ( بلـوچستـان ) ءِ واهنــد ءُ مالـک انت. ايرانـی ءُ پاکستانـی زرپرستيـــں واکــداراں پـه همـے آوارجتگيــں ملـک ءِ مدامــی وتيگی کنــگ ءَ سـَگـُــرک ( هاريں سگ ءُ گـُرک ءِ ... ) پيمـا بلــوچ ءُ بلوچستــان پاکيـــں سرزميــن ءِ ســرا رستـــری کنگاينــت.
ما را زانگـي انــت که رستريـں واکــداراں مـا را مـاں مئـی وتــی هنکيـــن ءُ بـُن پيـرُکـی مُلک درآمــد زاننـــت! مئـے ملـک ءَ پــل ءُ پانچ کننـت، مـا را چه مئـے وتی راجـی سرمايه هاں زبـهر کننـت. مـا را وتـی مدامـی چمــدار کنگ ءِ کوشسـت کننـت.
بلوچستـــان اِش ويران کـتــگ ءُ چـه لاهـور، اســلام آباد، تهــران ءَ اسپـهـان ءَ بازپـدتـرا داشتــگ. مــاں وتــی هـَـند ءُ دمگاں په پارس ءُ پنجـاپ ءِ مردمـانءِ زندجاورانــی گهبــودی ءُ آهانـی آسراتــی ءَ بے هسـاب کتـاب زر هــرچ کنگاينــت. همـا زر که چه بلوچستــان ءِ راجــی مال ءُ سرمايه گــوں مکـّاری ءُ زبر دستــی ءَ پل ءُ پانــچ بوتگنــت.
گـوں ايردستيــں مردمانــی راجـی مال ءُ ملـی سرمايه يانی پــل پانچ کنـگ ءَ همـے واکدارانی چک ءُ چک زاتـکاں مـاں کانادا ءُ اروپايـی مزن شهــراں چـوش که تورنتـو، پاريس، لنــدن، رُم، مادريــد، هامبــورگ، فرانکفــورت ءُ مونيـخ ءَ گرانيـں لوگجاه ءُ مـِلک په بها رزتـگ ءُ ميلياردانی دلار ماں يوروپی بورسی بازاراں ءُ بانکاں چير داتـگ ءُ اير کتگ انـت. اے دُزکـی مالاں هنــّـون اوشتارينـگ بوتگنـت ءُ آهيريـں ايرانی واکــدار اِش چه آ ملکاں در کت نکننت. بوت کنـت انت که گڈسـرا صدام حسين، کرنل قذافی، حسنی مبـارک ءُ بن علــی ءِ دُزُکــی ميلياردانـی پيمــا بے پَــد ءُ بے نشــان بـه بنــت!
ايرانی ءُ پاکستانی رستريــں واکـداراں هنچــو چه انســان ءُ انسانيـت ءَ دور بوتگـنـت که په مئی وتــن ( گلزميــن ) ءِ زوربرد کنگ ءُ پـه وتی سياسـی ـ زرّی نــپ ءُ پاـئدگ ءِ هاتــرا مـا را لـٹ کـٹ کننــت، لنگ ءُ لچ کننت، کارچ ءُ تـيــر جننـت، زدگ ءُ ٹپـّی کننــت، گرنت ءُ بندی کننت، لوپ ءُ لونج کننـت، ازاب دينت، کشـنت، درانڈيه کننت يا که لوٹنت ما را مــدامـی چمــدار ءُ ايردست بدارنــت ءُ آرام آرام بلوچستـــان ءَ وتيگــی بکننـت. اشــاں وتا را مسلمــان هم زاننــت!
بلـے فاشيستانـی اے شوميــں واب ءُ بلوچ دژمنيـں مکســداں پوره نه بنــت. بلــوچ ورنايانی سهريـں هونــان ءُ جهدانی برکــت ءَ اـے گلامــی دؤر هــلاس بيــت ءُ اوپارکشيـں بلــوچ راج ءُ بلوچانـی بـُن پيرکی گلزميــن آزات بنــت.
مئی پهـــرآوريــں راجدپتــر پــيش داريــت کـه بلــوچ راج ءُ بلوچستــــان هـــچ واکــے ءِ ايردستــی ءَ نه مـنّ اِتــگ ءُ هنونيــں فاشيستانــی گلامــی ءَ هـم هــچ بـر نه مـــنّ ايـــت.
بلوچستـــان ءِ پليــــں شهيـــدان ءَ هـــزاراں ســــلام
پروشت ءُ پـروش باتنـت ايران ءُ پاکستـان
آزات ءُ آباد بات گنجيــــــں بلـوچستــــــــان
محمــد کريــم بلــوچ
بيســـت ءُ چار دسمبـــر ۲۰۱۱
http://baluchistan47.blogspot.com/
No comments:
Post a Comment