انســان دژمنيـں زالمانـی « سايبـری» جنـگ

گوستگیں هپتگ ءَ ايرانی« ميديا » چه اِيـــرآپ ( دزآپ ) ءَ جـارپــرّينـــت که بلــوچ کـُـشيـں هاتــم نارويی يـک گروپے چه ناشــر ءُ زوراکيـں ‎ڈنـی ياں ٹاهينتگ تانکه ماں آوارجتگيــں بلوچستــــــان ءَ « سايبری» جنگ ءِ سروکی ءَ بکننت.

 اے گروپ چه نه ( ۹) نپـر اڈ بوتگ که يکـّے چه آدگـرا جاهل تر ءُ بلوچ دژمن تر انت ءُ چـه انسانيت ءُ زانت ءَ باز دور انت. اے تهارپگریں ٹولــی ءِ نام « پدافنـد سايبری » اِيـر کنگ بوتـگ ءُ اشانی مستریں اگده هميش انت که په وتی زوراکی ءِ برجاه دارگ ءَ بلــوچ ورناياں گٹ تروس بکننــت ءُ بلوچ ءِ هـک لوٹـی ءِ « سيگنال » اينترنت ءِ سرا گـوں « فيلترينگ» بند ءُ کبل بکننت۔

اے شومپالیں گروپ ءِ هاله ئيـں مکســد ملک ءِ اينترنتی ندکار ءُ بلوچ وب واهندانــی هلاپ ءَ گيشتريـں چاروگـی ءُ آهانی گٹ تروس کنگ انت ءُ هـور گـوں بلوچ کـُـشيـں هاتــم نارويــی ( فاشيستيـں واکدارانـی درگوشيــں گــلام، رستريـں سپاه ءِ نامينتگیں استانــدار ، هدامرزی نزر هان نارويی ءُ آسـا بامری ءِ کُشــوک ) په مئی ديمروی ءِ ديمپانی ءَ هر کارزوالی کننت. اِشاں جاهلـی ءِ همـا جـُهلانکـی ءَ کپتگ انت که چه جمکــران ءِ پر پوجگليـں چاه ءَ هم تهــار ترانــت.

ايرانی زورانســر ءُ زوراکانی تــرس ءُ بيم چه نوکيـں تکنولوجی ءُ چه اينترنت ءَ هنچو باز انت که ماں اے پـڑ ءَ ايردستيـں مردمانی بيـداری ءِ ديمپانی ءُ پـه آهانی ديمـرويءِ اوشتارينگ ءَ وڑوڑیں رپک ءُ پنــدل کارمرز کننــت.

اے مروچيگيــں گپـــے وَ نهنـــت که تهـــران ءِ زالميـں واکداران ءُ آهانـی نامينتگيـں دَمَگـی (هـَنـدی ) مردم، زابلـی ٹولـیءُ جاهلي اداره هـور گـوں بلـوچ دژمنيــں فاشيســم ءِ بدنسيبيـں پگــری گـُلاماں يک ناهودگيــں « سايبـری » جنگــے بلـوچانـی هـلاپ ءَ اينترنـت ءِ سـرا بنگيـج کتگ . بلـوچ گلزميــن ءِ ويران کنــگ، بلوچ راج ءِ زندجـاورانی پـدا دارگ، هزاراں بيگناهيـں بلــوچ ءِ دسگــر ءُ بنـدی کنـگ، بلـوچ ورنايانــی ازاب ءُ پاهـو ديگ، لــٹ کـٹ، کشت ءُ کشتـار ءُ فاشيستانـی کينگــی کارپــد ءُ زهرکنيـں کارکـِرد مـاں گلـزميــن ءَ گوشينـَے په تهــران ءِ بـے تمدنيــں واکــداراں بـس نهنـت که گـوں «سايبـری» جنـگ مارا اينترنــت ءِ سـرا، گـٹ تـروس کنـگ ءُ بـے تـوار بيـگ ءِ کوشسـت ءَ کنـگاينـت. آهانـی يـک مکســدے چه اے جاهلـی جنگ بلـوچ ورنايانـی بيـداری ءُ آگاهــی ءِ ديمپــانــی ءُ مـَهـْن کنـگ انـت.

په انگريــزءِ اڈکتگيــں ايـران ءِ بيمـاريـں زنـدءِ دراج کـش کنـگ ءُ تهــران ءِ هکومـت ءِ پشتـداری ءَ شونيستيـں ايران پرستانــی بـے بنياتيـں نبشتـه کاری دگه بهــرے چه اے شومپاليــں جنــگ انـت. شونيستـيـں کلمـکار هنچـوش نبشتـه کننــت که گوشينـے بلوچستــــــان آهانـی پـت ءِ ميـراس انـت ءُ بلوچ آهانـی مـدامـی بنديـگ ءُ ايردســت. لهتيـں چه کٹريــں فاشيستـی نبشتـه کار هنچــو هـارّ انــت که رونشتـی بلوچستـان وتـی جاگه ءَ بلکيــں رودراتکـی بلوچستـان هـم ايران ءِ بهــرے زاننــت ءُ پـه تماميــں بلوچــاں که په وتـی راجـی هـکاں جهدکنگاينـت ءُ تهـران ءِ زورانسـريں هکومت ءُ اسلام آباد ءِ رستريـں واکدارانی هــلاپ انـت، دنتـان درشگاينــت

اے نوکيـں گپـے نه انـت که بـے لگاميـں ايرانـی واکـدار ءُ آهانی جاســوس گـوں بدنيتـی ءُ شوميـں مکســداں مـاں اينترنتـی پـڑ ءُ په بلوچانـی گٹ تـروس کنـگ ءَ لانچتـگ. بلوچانی نميرانيـں اوبادگـــاں یعقــــوب مهرنهــاد ءُ عبدالناصـر طاهری ءُ عبدالباسـط ريگـیءِ پاهـو ديگ، عبدالوهاب ريگـی ءُ سخی نارويی ءَ ماں کورچاتـاں ازاب ديـگ ، بلـوچ سياسـی هوربنـد ءُ جهدکارانـی هــلاپ ءَ بهتام جـَنـَگ ءُ بے بنياتيـں هـال شنـگ کنـگ، بلوچ سياسـی جهدکـار، آشوبـی نـدکار ءُ ديمـروی پسنديـں نبشتـه کارانـی نام ءُ نشانانـی درگيجــگ ءَ اينترنــت اِش وتـی چگلــی ازباب جـوڑ کتـگ. چنـت « فيلتـر» نه بوتگيــں وبسايـت ءُ وبـلاگ ايران ءِ چگلـی اداره ءُ تروريستی « سپاه قـدس» ءِ ناهودگيــں « سايبـری » جنـگ ءِ بهــرے انـت.

ايرانی فاشيست ءُ آهانی بلوچ دژمنيـں دمگــی ٹولــی نه لوٹنت که بلوچانی نگيگيں زند جاوراں، بلوچستــان ءِ شهيدانـی باروا شئيـر و نبشتانــک ، بلوچستــان ءِ وت مستــری ( استقــلال ) ءُ آزاتـی ءِ باروا نبيسـگ ءُ دليـل آرگ، فاشيستيـں واکدارانـی بلوچ دژمنيـں سياســت ءُ آهانـی رستـری کاکـرد ءِ باورا تچکاتچــک نبيسـگ ءُ پارس فاشيسـم ءِ تهارپگــری، بدنيتــی، زرپرستــی، انسان دژمنـی ءُ بے تمدنـی ء باروا ندکـارانی نبشتانک اينترنت ءِ سرا اير به بنت.

ايران ءِ سيه ديــم ءُ زورانسريــں واکـداراں نه لوٹنـت که بلــوچ مهلـوک چه وتی گنجيـں بلوچستــان ءِ کـُـدرتی مــال ءُ مادنيــات ءَ سهـی به بنـت. آ نه لوٹنـت که بلوچ ءُ دگه راجاں سهــی ءُ سرپد به بنت که بلوچ گلزمين ءِ راجی سرمايه پل ءُ پانچ بيگاينت ءُ گئير بلـوچيــں زردار هور گـوں هکومتـی مـردم شپ ءُ روچ بلوچستــان ءِ کيمتــی ڈل ءُ ڈوک ءُ دگـه راجی مـال کـَش انــت ءُ کرمان، يـزد، اسپهان، مـَـشَــد ءُ تهــران ءَ بـَرَنـت.

ايـرانی پلينـڈ ءُ آهيريــں واکـدار ءُ آهانی هونواريـں دَمَــگـی ٹولــی لوٹنـت هما وڑ ءَ که په آهانــی نپ ءُ پائدگ انت بلوچستــان ءِ جاوراں پيش بدارنت. آ نه لوٹنـت که بلوچستــــــان ءِ کيلــگ ءُ کوچـگ ءُ زر ءِ باروا نبيســگ به بيـت. آ گنجيـں بلوچستـان ءَ وتيگــی کنـگ لوٹنـت. آ بلوچستــان ءِ هاله ئيـں راجدپتـر بـزاں تاريـخءَ په کسـت چيردينــت يا که پارس پسنديــں دابے نبشتـه کنگ لوٹنـت. آ شهديـں بلوچـی زبان ءِ سـرا زهــرکـن ءُ کينگـی انـت. بلـوچ راج ءِ آجويـی ءُ بلوچستـان ءِ استـقـلال ءِ دژمـن انـت پرچـا کـه بيـد چه آوارجتگيــں بلوچستــــــان ءِ ايردســت دارگ ءُ پل ءُ پانـچ ءَ دلجمـی گپـے که انگريــز ءِ اڈکتگيــں « ايران » پروشيـت. گـڑا پـارس مهلــوک بايدانـت په وتی بـن پيروکـی هنکيــں بـزاں يـزد ءُ کرمـان ءُ اسپهــان ءِ پــٹ ءُ ريگــزار هـُـژنـود به بنـت ءُ پاکيـــں بلوچستــان انسان دژمنيـں زابلی ٹـولـی يانی جاه نهنــت.

دگـرانـی سرزميـن ءُ مال ءِ سرا تاں «ابــد» تمـاه اِش مـه بيــت ءُ جاهلـی ءَ اَنـگار کننـت ءُ چـه دگنيــاءِ آزاتيــن ءُ ديما شتگيــں مردم يات بگرنــت که « تمــدّن » ءُ « تہـذيـب » ءِ بزانـت ءُ مانا چے انـت ءُ همسـاهگــی ءِ داب ( وڑ ءُ پيــم ) چـون انـت. ڈنـی ياں بايدانـت به مـنّ انـت کـه دزآپ، نصرت آباد، محمــدآباد، بزمــان، دلـگان، بـم ءُ کرمان ءِ زرباری ( جنوبـی) بهــر، واش، شستــون، دزک، جالـک، نائـوگ، ســوران، مگــس، دهــوار،پهــره، آشــار، ايرکشـان، سربــاز، دشتيــاری، ڈمـّـن، بُـن پهــل ( بـُـن پـور)، گـِه، هيچـان، پنـوچ، بنـت، گيابـان، لاشـار، مينــاب، جاسـک، کنـرک، چهبـار، گلزميـن ءِ دراجيـں تيـاب، باهـکلات ءُ زرآباد بلوچانی هنکيــن انــت همـا وڑ ءَ کـه رودراتکـی بلوچستــان بلـوچ ءِ ڈيـه ءُ هنکيــن انت. بلوچـانــی کشـت ءُ کـوش، بلوچستــان ءِ آوارجنـگ، بلـوچ راج ءِ هنکيــن ءِ زوربـُـرد کنـگ ءُ بلــوچ ءِ مـال ءُ روزی ءِ پـل ءُ پانـچ ميان استمــانـی رهبندانــی هــلاپ ءُ گئيـر کانـودی ءُ گئيـر انسانـی کارکِــرد اَنـت.

اگاں چه بلوچستــــــان ءِ سياسـی وبسايـت ءُ وبلاگاں که فاشيستانـی هلاپ انت چنت سال انت ماں آوار جتگيـں بلوچستان ءَ بند انت بلئـے بلوچ سياسی ءُ ادبی ندکار ءُ راجی شائرانی کار هر روچ ماں ملک ءَ شنگ ءُ تالان بنــت. بلوچانـی راجی بيداری ءِ ديم گـوں « فيلترينگ » ءُ « کــُــد » ءُ کبـل دارگ نه بيـت. بلـوچ ورنا روچ په روچ چه وتـی راجـی پجـّـار ءُ راجــی هکـّـاں گيشتـــرسرپـــد ءُ بيـداربيگاينـت. ايرانی چُگـُـل ءُ جاسوس بلــوچ کـُـشيـں هاتم نارويی، بـے دريـں دهمرده، رستريــں شهرياری، نورا ءُ پليتيــں « سپاه قدس » بلوچ ءِ هک لوٹی ءِ کاروان ءِ ديمــا دگـه داشت کـت نکننــت. بلـوچستــــــان ءِ شهيــــدانی هونانــی برکـــت ءَ اے سرپديـں کاروان اوشتارينگــی نهنــت ءُ ديــــم پـه وتـی آهــری منـزل بزان استقـــلال بلـوچستــــــان ءُ پـوره ئيـں وت مستـــری ءَ گام جنـــــان انــــــت.

پروشـت ءُ پـروش باتنــت ايران ءُ پاکستـان
آزات ءُ آبات بات گنجيـــں بلـوچستــــــــــان

محمـــد کريـم بلــوچ

دوازده شاهــِگــان
بريبر گـوں اول اگســت ۲۰۱۳

http://baluchistan47.blogspot.no/2013/08/blog-post.html