سپاه قـدس ءُ آی۰ اس۰ آی ءِ « مذاکـرات » ءِ پنـــدل

Saturday, April 1, 2017

سپاه قـدس ءُ آی۰ اس۰ آی ءِ « مذاکـرات » ءِ پنـــدل

بلوچستـان ءِ راجدپتـر پیش داریت که گوں ایرانی ءُ پاکستانی زورانسریں واکداراں « مذاکرات »  کنگ  هچ آسـر ءُ بَروَردے په بلــوچ راج ءَ  بید چه سرمتابیـں سرانی زوال ءُ راجی جهدانی دیمپانی ءَ گوں نه بوتـگ  ۰ 

پلینڈیـں پارس ءُ رستریں پنجاپـی  واکداراں  گوں دروگیں سوگند  ده رندا گیش مئے راجی کَلانیں سروکاں په مذاکره کنگ  لوٹائینتگ ءُ آهان اِش یا ماں دیوان جاهاں کشتگ یا که دسگر ءُ بندی  کتگ انت ءُ ماں کورچاتان اِش شـزا ءُ پاهـو داتگ اَنـت۰

مئی راجدپتـرءِ یک مزنیں دَرس ءُ اِندرِستے اِیش انت که مئے دژمنانی گورا « مذاکرات »  یا گپ ءُ گال یک پندلے زانگ بیت ءُ بَس۰ اے هما جَـوریں  تجربه اِنت که مئے مروچیگیں راجی رهشوناں اشی ءِ چکاسـگ ءِ کوشست ءَ مه کتیں گهتـراَت۰   اگاں چے دوارسوچیں « مذاکرات » ءِ پندل  چه تهـران ءُ اسلام آبادءِ واکدارانی نیمگ ءَ هنوں کار مرز بیگا اِنت بلئے بلـوچ بایداِنت شیوار ءُ هژار به بنت۰

گوں « مذاکرات » ءِ رپک ءُ پندل بلــوچ راجءِ بی درورین ءُ برزیں سراں گُــڈّگ بوتگنت ءُ   اگاں راجدپتـری تجربه یاں شموشگ به بنت ءُ کَسّے پـدا تهـران یا اسلام آباد ءِ چیروکایی مذاکرات ءِ ابلیسی دام ءَ ماں گیشّ اِت گـُڑا اے  وت کُشــی اِنـت ءُ تباهـی۰ ماں دژمنانی رپک ءُ پندلانی دام ءَ کَپگ بی اُگده ای اِنت ءُ راجی جنز ءِ سریں پروش کنـگ۰

چشیں سیاسی ناسرپدی دژمنانی سوب انت۰ هنوں هبـر وَ چه هلـوت ءَ گوستگ ۰ گِندگائیــں که  بلوچ کشیں سپاه قدس وتی پندلاں گیش کتگ ءُ مذاکـراتءِ دام اِش پیش چه نزّآرینـگ ءَ گوں ڈالَـرءُ زَرّ سمبهینتــگ۰  اداں چنت گپ گوں بلوچستــان ءِ درستیـں راجی رهشوناں هاسـکار گوں نوک بَـروت ءُ ناپُهته ئیـں « کمانڈر » کنگی اِنت  تاںکہ نه گوَشتگیـں گپے پَشـت مَـه کپیـت۰

  ـ هــر وهـدا که دشمـن نـزور بوتگ انت، گڑا آ بلوچاںی کماش اِش گوں بدنیتی په « مذاکــره » ءَ  لوٹائینتگ انت ۰

 ــ پارس ءُ پنجاپی یاں په مذاکـره ءِ نیمـون ءَ  هوری رپک ءُ پندل  سازاَنت  تاں بلوچانی راجی جهداں پروش بدینت۰    

   ــ گُستاهیـں  دشمناں مُدام وت  پیسله کتگ که مذاکره  کجام جاگه  ءُ چه وهــدا به بیـت. 

  ــ  دوتل ءُ دوپوستیں پارس ءُ پنجاپی واکداراں پیش داشتـگ که په دروگیں سوگند ورگءَ مُدام تیارنت۰  هرچیزے ءِ سرا کَسَم  ورنت تاں بلوچانی سروکاں په آسانی ءَ به ریپین انت۰   

 ــ آ میارجلـی ءُ مهمان داری که مئی بلوچانی راجی دود ءُ ربیدگ ءِ بهـرے انت ماں مئے دژمنانی زند ءُ دود ءُ ربیدگ ءَ په بِیه نیسـت۰ میر دوست محمد هان ءِشهادت ماں تهران (۱۹۲۹ عیسایی ) ءُ  احمدیار هان ءِ په زور جَلّینـَـگ ماں کراچی ( ۱۹۴۸ عیسایی  ) ءَ اے گپ ءِ دو پَدّریـں دَرورانت۰

ــ بلوچ راج ءِ دژمناں هنوں گندگاینت که بیداریں بلوچانی راجی جنز دیمروی کنگ اِنت ءُ  سیاسی زانتکآر ءُ سرمتابیں سر چِست اَنت۰ آ هَمُـک پلینڈی ءُ انسان دژمنیں  کار کننت تا همے برزیں سرآں به گُـڈانــت۰  

 ــ  اسلام آباد ءُ تهـران ءِ واکداراں بلــوچ ءُ بلوچستــان ءِ هلاپ ءَ همشور ءُ تپاک اَنت۰  آهاں جاسوسی، اقتصادی، سلهبندی ءُ سیاسی همکاری هست تاں بلوچستان ءَ مدام وتی پنجگانی چیـرا بدارنت  ۰  
 ــ ایرانی سپاه پاسداران ءِ کارکرد ماں بلوچستــان، کوردستان، آزربایجان، الاحواز، اوگانستان، یمن، عراق ، ترکیه،  شام ءُ لبنان پیش داشتگ کہ اے یک تروریستی ٹولے ایت۰ سی ءُ هشت سال اِنت که بلوچ راج تروریستی سپاهءِ رستری کارکردانی آماچ اِنت۰ 
بوت کنت که مرچی باندا اروپا ءُ امریکائی بازیں ملک جار پِرّیننت که ایران ءِ سپاه یک تروریستے لشکرے انت۰ گوں چشیں تروریستاں مذاکره ءُ گپ ءُ گآل په بلــوچ ءِ راجی جنزءِ نپ ءُ سیت ءَ نهنت۰ بلوچستـــان ءِ دیمروی پسندیں آجویی ءِ زرمبشت پکائیں وڑے ءَ مآں دگنیاےءَ پیش دارگی انــت۰ 

  ــ  بلـوچ دژمنیں ایران ءِ واکدارانی دگه پندلے ایش انت که رودراتکی ءُ رونشتی بلوچستـان ءِ راجی جهدکاراں به میڑینیت بزاں جنگ بدینت۰  په اے کارا هر وڑیں ابلیسی پنـدل کار مرز کنگاینـت۰ مئے بلــوچ براساں زانگی انت که ایرانی جاسوس ءُ سپاه هور گـوں  پاکستانی آی۰اس۰ آی ءُ پنجاب ءِ پئوج بلوچانی هونی دژمن اَنت۰  

 ــ رونشتی بلوچستــان ءِ ناسرپدیں  "بسیج عشایر" چه دژمـن ءِ دوارسوچیں پندلاں  نآسهی انت۰ چنت نپر چه همے ٹولی ءِ کماش ءُ اسپیت ریش ءَ په کاسدی ءَ کارمزکنگاینت تاںکہ مئے بلوچ جهدکاراں ماں گلزمین ءِ روکپتی بهرا آسانتــر به ریپیـن اَنت۰ 

 ــ اگاں ایران ءُ پاکستان په بلـوچ راجی جهدکارانی وت ماں وت میڑینـگ ءَ ماں هنونیں دَورا سوبیں به بنت  گڑا هما داورسوچیں آس روک بیت که  درستـاں سوچیت ءُ پُر کنت ءُ میاریگیں  سروک  اگاں مه سوچَنت بلئے ایکیم اوں که سرسوچ بنت ءُ زندکا پیلوشنت۰ دژمناں چه دوئیـں نیمـگ ءَ  بلوچانی بربادی ءَ جشـن گرنت۰ چه هر نیمگے ءَ بلوچ تآوانبار بنت ءُ دژمنان باج بَرَنــت۰ 

 ــ  اگاں ایرانی سپاه قـدس ءُ آی۰ اس۰ آی په بلوچانی میڑینگ ءَ کامیاب به  بنت گـُڑا بلوچانی  پدریچ میاریگین ءُ  ردوارتگیں  سروکاں هچبر پَهـل نکننــت۰

     گڈسرا اے گپ گوشگی انت که ملاهامنه ای ءُ سپاه قدس ءِ مستریں واهگ ءُ مکسد بلوچستـانءِ  زوربرد کنگ انت۰ آ مزنیں پرشیاے ءِ ناهودگیں واب ءَ بُڈاتگ اَنت۰
پروشــت ءُ پــروش باتنــت ايران ءُ پاکستـان 
آزات ءُ آبــاد بــات گنجيــــــں بلـوچستـــــــان 
محمــد کـريــم بلــوچ
آپریل  ۲۰۱۷

http://baluchistan47.blogspot.se/2017/04/blog-post.html